Slotdan “Qarabağ”a mesaj: “Qələbə qazanmaq istəyirik”

“Liverpul”un baş məşqçisi Arne Slot “Qarabağ”la oyun öncəsi heyətdəki itkilər və matçla bağlı gözləntilərindən danışıb.

Sport1.az xəbər verir ki, niderlandlı mütəxəssis mətbuat konfransında bildirib ki, komandanın futbolçularından biri sabahkı görüşdə forma geyinə bilməyəcək:

“Co sabahkı oyunda iştirak edə bilməyəcək. Konateylə danışdım və bilirik ki, o, çətin günlər keçirir (bugünlərdə atası vəfat edib - red.). Onun tezliklə geri dönməsinə ümid edirəm, amma sabah üçün yox”.

Slot Premyer Liqada komandanın mövqeyinə görə təzyiqlərin davam etdiyini də vurğulayıb:

“Bir neçə oyun qazanmağımız belə səs-küyü dayandırmaz. Belə klublarda çempionluq uğrunda mübarizə aparmırsınızsa, bu təzyiqi dayandırmaq mümkün deyil”.

Baş məşqçi Çempionlar Liqasının ümumi vəziyyətində bir-iki pillə fərqinin böyük əhəmiyyət daşımadığını qeyd edib:

“Həm Çempionlar Liqası, həm də Premyer Liqada mübarizə aparmaq bizim üçün çətindir. ÇL oyunlarından sonra çox matçda xal itirdik”.

Slot “Liverpul”un Liqa mərhələsini ilk “dördlük”də bitirmək istədiyini və “Qarabağ” matçına ciddi hazırlaşdıqlarını da söyləyib:

“Qalib gəlmək istəyirik. Lakin heyətdə zədəli futbolçularımız var. “Bornmut”a qarşı matçda əsas heyətin 11 futbolçusuna şans verməyə bilməzdim. “Qarabağ”ın baş məşqçisi Qurban Qurbanov Azərbaycan çempionatında keçirdikləri son matçda bunu edib. Eyni şeyi mən təkrarlaya bilməzdim”.

Mütəxəssis rəqibin bu mövsüm güclü komandalarla oyunlarda özünü göstərdiyini də xatırladıb:

“Rəqibin heyətində sürətli futbolçular var. Topla rahat rəftar edirlər. “Qarabağ” öz bacarığını bu mövsüm güclü komandalara göstərib. Onlar asanlıqla məğlub ediləcək rəqib deyil. Hətta “Qarabağ” bu mövsüm Çempionlar Liqasında “Çelsi”yə qarşı matçda 2:2 hesablı heç-heçəyə nail olub. Bu da onu göstərir ki, qitənin ən nüfuzlu klub turnirində zəif komanda yoxdur. Bizim cari mövsüm Çempionlar Liqasında qarşılaşdığımız bütün komandalar güclü olub”.

Qeyd edək ki, “Liverpul” – “Qarabağ” oyunu yanvarın 28-dən 29-na keçən gecə “Enfild” stadionunda keçiriləcək və Bakı vaxtı ilə saat 00:00-da başlayacaq