Renatın əvəzinə sloveniyalı

Polşanın “Motor” klubu azərbaycanlı futbolçu Renat Dadaşovun mümkün gedişini nəzərə alaraq alternativ axtarışlara başlayıb.

Sport1.az xəbər verir ki, yerli mətbuatın yazdığına görə, Lublin təmsilçisi son olaraq “Qornik”dən ayrılan Luka Zahoviçi gündəminə gətirib.

“Motor” sloveniyalı hücumçu ilə ilkin təmaslara başlayıb. Bu transfer reallaşacağı halda, Renat Dadaşovun komandadan ayrılma ehtimalının daha da artacağı istisna edilmir.

Bildirilir ki, Ekstraklasa klubu qış hazırlıqlarına sabahdan start verəcək. İlk mərhələni ölkə daxilində keçirəcək kollektiv yanvarın 10-da hazırlığın növbəti hissəsi üçün Türkiyəyə yollanacaq. Hazırda Renatın təlim-məşq toplanışında yer alıb-almayacağı ilə bağlı yekun qərar verilməyib.

Qeyd edək ki, Renat Dadaşovun “Motor”la müqaviləsi mövsümün sonuna qədər qüvvədədir və futbolçunun gələcək taleyi hələlik qeyri-müəyyən olaraq qalır.