“Sabah” – “Abşeron Lions” oyunu iki hakimlə başlamasının səbəbi nə idi?

20 dekabr 2025-ci il tarixində Azərbaycan Basketbol Liqasının (ABL) 10-cu turu çərçivəsində keçirilmiş “Sabah” – “Abşeron Lions” oyunu ilə bağlı rəsmi açıqlama yayılıb.

Sport1.az xəbər verir ki, ilk olaraq Azərbaycan Basketbol Liqasının (ABL) A qrupunun lider klublarından olan “Sabah” və “Abşeron Lions” komandaları cari mövsümdə həm ABL-də, həm də Avrokuboklarda nümayiş etdirdikləri yüksək səviyyəli oyunlara görə təbrik edilib.

Açıqlamada qarşılaşma ilə bağlı mühüm məqamlara aydınlıq gətirilib. Bildirilib ki, Azərbaycan Basketbol Liqasının oyunları adətən üç hakim sistemi ilə idarə olunur. Lakin fors-major hallar zamanı FIBA qaydalarına əsasən (45-ci maddə) oyunun iki hakimlə başlanmasına, üçüncü hakimin sonradan görüşə qoşulmasına və ya matçın iki hakimlə tamamlanmasına icazə verilir.

Qeyd olunan oyunda da fors-major vəziyyət yarandığı üçün qarşılaşmanın iki hakimlə başlaması hər iki kluba təklif olunub və tərəflərin qarşılıqlı razılığı əsasında görüş iki hakimlə start götürüb. Birinci periodun gedişində üçüncü hakimin oyuna qoşulması ilə qarşılaşma üç hakim sistemi ilə davam etdirilərək başa çatdırılıb.

Rəsmi açıqlamada hakimlərin idarəçiliyi ilə bağlı məsələyə də toxunulub. Aparılan ətraflı təhlil nəticəsində oyun ərzində hər iki komandanın lehinə və əleyhinə həm ciddi, həm də xırda hakim səhvlərinin olduğu müəyyən edilib. Bununla belə, bu səhvlərin oyunun yekun nəticəsinə birbaşa təsir göstərmədiyi qənaətinə gəlinib.

Buna baxmayaraq, sözügedən qarşılaşmanı idarə edən hakimlər barəsində intizam tədbirlərinin görülməsi və oyun cəzasının tətbiq edilməsi qərara alınıb.