Millimiz Avropa birinciliyində səkkizinci oldu

Türkiyənin Antalya şəhərində keçirilən qılıncoynatma üzrə gənclərin Avropa birinciliyinə yekun vurulub.

Sport1.az xəbər verir ki, son yarış günündə qızların şpaqa və oğlanların sablya komanda yarışında qaliblər müəyyənləşib.

Rəsul Əliyev, Abbas Hüseynov, Timur Husnaddinov və Ayxan Xasıyevdən ibarət millimiz yarışda 8-ci olub.

İlk görüşündə İspaniya yığmasına 45:42 hesabı ilə qalib gələn qılıncoynadanlarımız ən güclü “səkkizlik”də turnirin gümüş medalçısı Fransa seçmə kollektivinə 29:45 hesabı ilə məğlub olub. Komandamız 5-8-ci yerlər uğrunda keçirilən qarşılaşmalarda Almaniya və Rumıniya millilərinə 41:45 hesab ilə uduzub.

Xatun Bayramova, Aynur Quliyeva, Xədicə Həsənli və Nazilə Rəhimovadan ibarət şpaqa üzrə millimiz isə qızların komanda yarışında 14-cü olub.
Komandamız ilk görüşündə turnirin finalçısı Macarıstan yığmasına 34:45 hesabı ilə məğlub olub.

9-16-cı yerlər uğrunda keçirilən görüşlərdə Türkiyə millisinə 31:45 hesabı ilə uduzan şpaqaçılarımız son qarşılaşmada isveçrəli rəqibləri ilə də bacarmayıblar - 41:45.