Diqqət! Çıxış edir Vernidublu “Neftçi” – YAZI

“Neftçi” Premyer Liqada yeni baş məşqçisi Yuri Vernidubla ilk rəsmi oyununa çıxmağa hazırlaşır. “Ağ-qaralar” bu gün doğma azarkeşləri önündə çempionatın 4-cü pilləsində qərarlaşan “Sumqayıt”ı qəbul edəcək. Bu qarşılaşma turnir cədvəlində vəziyyəti ürəkaçan olmayan flaqman üçün növbəti oyun deyil, həm də mövsümün istiqamətini müəyyənləşdirə biləcək ciddi bir sınaqdır.

Bu görüş eyni zamanda Vernidubun Azərbaycan futbolunda “Neftçi”nin sükanı arxasında ilk imtahanı olacaq.

Ukraynalı mütəxəssis artıq ilk açıqlaması ilə komandanın yalnız nəticə yox, xarakter də qazanmalı olduğunu açıq şəkildə bildirib. Yeni baş məşqçi qısa zamanda müsbət dəyişikliklərə nail olacaqlarına inandığını deyib:

“Əvvəlcə mütləq şəkildə nəticələri yaxşılaşdırmalıyıq. İşimiz çoxdur, amma qorxmuruq. Artıq bir neçə məşq keçmişəm, futbolçularda da istək və əzm hiss olunur. Rəhbərlikdən ilk gündən yalnız dəstək görürəm. İnanıram ki, bu çətinliyin öhdəsindən birlikdə gələcəyik. Hədəflərə gəlincə, “Neftçi”yə yalnız çempionluq yaraşır. İndi yerimiz yaxşı deyil, amma mövsümün sonunda ön pillələrdə olmalıyıq.

“Sumqayıt”la matçdan etibarən qələbələri sıralamağa çalışacağıq”.

Bu sözlərdən aydın görünür ki, Vernidub ilk gündən məsuliyyəti üzərinə götürür və bəhanələrə yer qoymur. Məhz buna görə də “Sumqayıt”la qarşılaşmanın nəticəsi yeni baş məşqçi üçün erkən olsa da, ciddi ölçü vahidi kimi qəbul ediləcək.

“Kimyaçılar”la qarşılaşma Yuri Vernidub üçün sadəcə debüt deyil, mesaj oyunudur. Ya “Neftçi”nin dəyişməyə başladığını göstərəcək, ya da problemlərin düşünüldüyündən daha dərin olduğunu ortaya çıxaracaq. Hər iki halda bu görüş mövsümün dönüş nöqtəsi kimi yadda qala bilər.

Doğma meydan, yeni baş məşqçi və azarkeş dəstəyi. Bəhanə yoxdur. İndi söz “Neftçi”dədir...

MƏHƏMMƏD HÜSEYNOV