"Qarabağ"ın bu futbolçusunun dəyəri 2 milyon avro civarındadır - TANINMIŞ MENECER AÇIQLADI

Son günlər Mateuş Koxalskinin "Qarabağ"dan ayrılacağı ilə bağlı məqalələr dərc olunur.

Mətbuatda yer alan xəbərlərə görə, "Napoli" və "Borussiya" (Dortmund) polşalı qolkiperlə maraqlanır.

Görəsən, Mateuşun "Qarabağ"dan ayrılma ehtimalı nə qədərdir? Ağdam təmsilçisinin 25 yaşlı "əlcək sahibi" ilə maraqlanan klublardan nə qədər məbləğ tələb etməlidir?

Sualımızı Emil Şükürova ünvanladıq. Tanınmış agent mövzu ilə bağlı Sport1.az-a açıqlamasında bunları söylədi:

"Adətən top liqaların klubları oyunçuları 1 mövsümlük və ya daha konkret desək, 3-4 oyunluq çıxışına görə transfer siyahısına salmır. Qapıçı mövqeyində oynayan oyunçuları isə ümumiyyətlə izləmək çətindir. Bu, skautinqin özəlliyidir. Koxalskinin Çempionlar Liqası oyunlarında özünü yaxşı tərəfdən göstərməsi qiymətini birmənalı şəkildə qaldırır. "Qarabağ"ın transferlərdən pul qazanmağı yaxşı bilən rəhbərliyi var. Düşünürəm ki, onlar oyunçunun qiymətini yaxşı bilirlər. Əsas məqam Koxalskinin uzunmüddətli müqavilədə olması və zamanında satılmasıdır ki, klub qazanclı olsun. İnanıram ki, Koxalski daha 2 mövsüm "Qarabağ"da qalar və qapıçı mövqeyində stabillik yaranar. Milli komandaya çağırılsa, transfer dəyəri bir az da artacaq. Hazırkı vəziyyətdə isə transfer qiyməti 2 milyon avro ətrafında olacağını düşünürəm".

MİKAYIL HACIYEV