Araz Abdullayev: "Biz bu zolaqdan çıxa biləcək potensialdayıq" - MÜSAHİBƏ

Misli Premyer Liqasının IX turunda "Karvan Yevlax" evdə "Turan Tovuz"a məğlub oldu - 1:2

Görüşdən sonra Yevlax təmsilçisinin hücumçusu Araz Abdullayev Sport1.az saytına müsahibə verdi...

-Oyun haqda düşüncələrin nələrdir?
-Görüş çox ağır keçdi. Lakin düşünürəm ki, komanda şəklində yaxşı mübarizə apardıq. Bəxtsizlik amili və bəzi anlarda təcrübəsizlik bu gün bizi xal qazanmağa imkan vermədi. Bu oyunda etdiyimiz səhvlərdən nəticə çıxaracağıq. Növbəti qarşılaşmalarda uğur qazanmağı hədəfləyirik. Fikrimcə, bu gün xal ala bilərdik. Bizim komanda bu yerdə olası kollektiv deyil. Gələcək oyunlarda da bunu görəcəksiniz.

-Uzun müddətdən sonra Premyer Liqada start heyətdə meydana çıxdığını görürük. Bunu necə ifadə edə bilərsən?
-İstər təcrübəmlə, istərsə də döyüşkənliyimlə komandama yardım etmək istəyirəm. Gələn oyunlarda da vəziyyəti düzəltmək üçün çalışmalıyıq. Hazırda başqa seçimimiz yoxdur. Bu gün uduzduq. Növbəti oyunlarda belə oynamağa davam etsək, mövcud durumdan çıxarıq.

-Bəs fiziki olaraq özünü necə hiss edirsən?
- Zədədən geri qayıtmışam. Amma yenə də özümü fərah hiss edirəm. İstəkliyəm. İkinci hissənin əvvəlində topuğum burxulmuşdu deyə biraz ağrılarım var idi. Əlimdən gələni etdim ki, komandama kömək edim.

-Hazırki heyətlə liqada qalacağınıza inanırsan?
- Əlbəttə, bugünkü oyunla bunu göstərdik. Məğlub olsaq belə, hesabda önə keçməyi bacarmışdıq. Biraz təcrübəsizlik, biraz da şanssızlıq bu gün bizə xallar qazanmağa imkan vermədi. İnanıram ki, biz bu zolaqdan çıxacaq potensialdayıq.

MİKAYIL HACIYEV