Milli ABŞ-a vaxtında çata bilmədi

DÇ-2026-nın iştirakçılarında olan Uruqvay millisinin ABŞ-a səfərində problem yaranıb.

Sport1.az "The Athletic"ə istinadən xəbər verir ki, Cənubi Amerika təmsilçisi Səudiyyə Ərəbistanı ilə keçirəcəyi qrup mərhələsi oyunu ərəfəsində ABŞ-a planlaşdırıldığı vaxtda uça bilməyib.

Buna səbəb təyyarənin uçuş sənədləri ilə bağlı yaranmış problem olub. Nəticədə komandanın Meksikadan Mayamiyə səfəri bir neçə saat gecikib.

Məlumata görə, yaranmış çətinlik səbəbindən yığmanın baş məşqçisi Marselo Byelsa və müdafiəçi Xose Mariya Ximenes üçün nəzərdə tutulan mətbuat konfransı da təhlükə altına düşüb.

Bəzi KİV-lər komandanın ABŞ-a eniş icazəsi ala bilmədiyini yazsa da, əsas səbəbin sənədləşmə və uçuş icazələri ilə bağlı texniki problem olduğu bildirilir. Daha sonra Uruqvay millisinin Mayamiyə yola düşdüyü açıqlanıb.

Yaranan problemlərə görə FİFA-nın Uruqvay Futbol Assosiasiyasına intizam sanksiyaları tətbiq etməsi riski var.

Qeyd edək ki, Uruqvay dünya çempionatının H qrupunda ilk oyununu iyunun 16-da Bakı vaxtı ilə saat 02:00-da Səudiyyə Ərəbistanına qarşı keçirəcək.