Bir yalanın izi ilə: "Karvan" niyə "Karvan-Yevlax" oldu?" - ARAŞDIRMA

2025/26 mövsümündə Premyer Liqada 12 komanda iştirak edəcək.

Ölkədə futbolun inkişafı adına böyük addımdır.

Amma bu qərar ölkə futbolundakı problemləri də ortaya çıxartdı. Bunlar nədir? "Qəbələ"nin əvəzedici komanda saxlamağa pulu yoxdur. "İmişli"nin stadionu yoxdur. Yevlaxdakı arenada ot örtüyü süni olacaq. "Şamaxı"nın hələ də sponsoru yoxdur. "Kəpəz"də aləm dəyib bir-birinə. Yəni, Premyer Liqa başlamamış ölkə futbolunda xaos hökm sürür. Ümid edək, hamısı zamanla düzələcək. Ya da ölkə futbolunun inkişafı üçün bunlara göz yummaq olar.

Amma saxtakarlığı necə görməzdən gələk? İnkişaf olacaq deyə vicdansızlıq edək? Axı biz jurnalistik. Doğruları, deməli, qəliz məsələləri araşdırmalıyıq, suallar verməliyik. Bu, bizim işimizdir. Elə isə başladıq.

Niyə Premyer Liqanın püşkatma mərasimində Karvan-Yevlax" adına rast gəldik? Bu komandanın adı "Karvan" deyil? PFL-ə müraciət etdik. Qurumun cavabını diqqətinizə çatdırıq:

“Yevlax təmsilçisinin Nizamnamə ilə adı “Karvan-Yevlax”dır. Odur ki, püşkatma mərasimində, eləcə də çempionatla bağlı digər bütün sənədlərdə klub bu adla təqdim olunacaq. Qeyd edək ki, I Liqada iştirak edən komandanın da adı “Karvan-Yevlax” olub.”

Bu klubun adı "Karvan-Yevlax"dırsa, "Karvan" hanı? Bir qədər araşdırma apardıq. Məlum oldu ki, "Karvan Futbol Klubu" MMC fəaliyyəti dayandırıb. Həmin VÖEN-in adı ilə tikinti şirkəti fəaliyyət göstərir. "Karvan-Yevlax" isə 2022-ci ilin dekabrında fəaliyyətə başlayıb.

2-3 gündür ki, əməkdaşımız "Karvan"ın mətbuat xidməti ilə əlaqə saxlamağa çalışıb. Nəyə görə "Karvan"ın adının "Karvan-Yevlax" olduğunu soruşub. Cavab sizi təəccübləndirə bilər:

"Həmişə "Karvan-Yevlax" olub".

Komanda 2022/23 mövsümündən I Liqada çıxış edir. O dövrdən PFL-in rəsmi saytında klubun adı "Karvan" olaraq qeyd olunub. 2 mövsüm ardıcıl səhv etmək olar?

Ortada böyük yalan var. Bunun səbəbini axtarırıq. Sualımız isə açıq və sadədir. "Karvan" niyə "Karvan-Yevlax" oldu?

Bizim məqsədimiz "Karvan"ın Premyer Liqadan kənarlaşdırılması deyil. Sport1.az olaraq istəyirik ki, Yevlax təmsilçisi elitada olsun. Amma bu dəyişikliyin əsl səbəbini kimsə açıqlasın. Necə oldu ki, 2 mövsüm "Karvan" olan klub birdən-birə "Karvan-Yevlax" oldu? Bu suala kim cavab verə bilər? AFFA, PFL, yoxsa klub? Açıqlayın ki, hər şey aydın olsun...

İLKİN SULTANLI