Güləşçimiz qızıl medal qazandı, millimiz rekorda imza atdı

Serbiyanın Novi Sad şəhərində U23 Dünya Çempionatında bu gün daha 2 güləşçimiz fəxri kürsüyə qalxıb.

Sport1.az xəbər verir ki, Elmir Əliyev (55 kq) finalda rusiyalı Alibek Amirovla qarşılaşıb.

Güləşçimiz U23 Avropa Çempionatının yarımfinalında məğlub olduğu rəqibindən revanş alıb – 3:2.
Beləliklə, Elmir karyerasında ilk dəfə Dünya çempionu olub.

Növbəti qələbə isə Ruslan Nurullayevdən (72 kq) gəlib. Təsəlliverici görüşdə ukraynalı Oleq Xəlilovu 3:1 hesabıyla üstələyən güləşçimiz bürünc medal uğrunda qarşılaşmada isə ermənistanlı Qaspar Terteryana eyni hesabla qalib gəlib.

Yunan-Roma güləşi üzrə yarışın bitməsinə 1 gün qalmış komandamız medalların əyarına görə yeni rekorda imza atıb. Belə ki, millimiz ilk dəfə U23 Dünya Çempionatında 2 qızıl medal qazanıb.

Xatırladaq ki, ötən gün Ziya Babaşov (63 kq) fəxri kürsünün ən yüksək pilləsinə qalxıb.