Zubir avrokuboklarda böyük ulduzlarla eyni siyahıya düşdü

“Qarabağ”ın yarımmüdafiəçisi Abdullah Zubir Avropa futbolunun ən məşhur simaları ilə bir sırada yer alıb.

Sport1.az xəbər verir ki, fransalı oyunçu Çempionlar Liqasının qrup mərhələsinin II turunda “Kopenhagen”ə qarşı keçirilən oyunda fərqlənərək unikal göstəriciyə imza atıb. 33 yaşlı futbolçu ardıcıl səkkizinci mövsümdə avrokubokların əsas mərhələsində qol vuran oyunçular siyahısına daxil olub.

Zubir bu nailiyyəti ilə Kilian Mbappe (“Real Madrid”), Harri Keyn (“Bavariya”), Məhəmməd Salah (“Liverpul”), Lautaro Martines (“İnter”) və Antuan Qrizmann (“Atletiko”) kimi ulduz futbolçuların rekordunu təkrarlayıb.

Qeyd edək ki, “Qarabağ” “Kopenhagen”i Bakıda 2:0 hesabı ilə məğlub edərək Çempionlar Liqasının qrup mərhələsində ilk qələbəsini qazanıb.