"Kayrat"ın baş məşqçisi "Real"la sabahkı oyundan danışdı

“Kayrat”ın (Qazaxıstan) baş məşqçisi Rafael Urazbaxtin UEFA Çempionlar Liqasının 2-ci turunda Madird "Real"ı ilə keçiriləcək ev oyunu haqda danışıb.

Sport1.az xəbər verir ki, o, qarşılaşmadan əvvəl təşkil edilən mətbuat konfransında deyib ki, "Real"la oyun Qazaxıstan futbolu üçün tarixi hadisədir:

"Biz böyük futbol bayramını səbirsizliklə gözləyirik. Bu, klub və Qazaxıstan üçün tarixi hadisədir. Hər kəs dünya səviyyəli ulduzları görməyi səbirsizliklə gözləyir. Üstəlik, "Real" ən yaxşı heyəti ilə gəlib. Biz özümüzü sınamağa can atırıq. Bu, bizə görə həm arzu, həm də sınaqdır",

Qazaxıstanlı mütəxəssis bildirib ki, rəqib nə qədər güclü olsa da, yaxşı oyun göstərmək istəyirlər: "Azarkeşlərin ümidlərini doğrultmağa çalışacağıq. Yaxşı çıxış etməliyik. Nəticə haqqında indi danışmaq istəmirəm. İlk növbədə, yaxşı performans göstərməliyik. Düşünürəm ki, belə vaxtlarda təkcə "Kayrat" azarkeşləri deyil, bütün Qazaxıstan bir araya gəlir. Biz bunu Çempionlar Liqasının təsnifat oyunlarında artıq hiss etdik. Qazaxıstanın hər yerindən dəstək var idi”.

Qeyd edək ki, "Kayrat" - "Real" oyunu sentyabrın 30-da Alma-Atada keçiriləcək və Bakı vaxtı ilə saat 20:45-də başlayacaq.