4 turda fərqlənənlər

Premyer Liqada IV tur başa çatdı.

Sport1.az xəbər verir ki, son çempion “Qarabağ” “Zirə”, “Neftçi” isə “Sabah”la heç-heçə edib. “Şamaxı” azarkeşləri önündə ilk qələbəsini qazanıb “Turan Tovuz” isə “Qəbələ”yə minimal hesabla qalib gəlib. Autsayder “Kəpəz” “Araz-Naxçıvan”la dueldən xalsız ayrılıb.

Çempionatda 4 tur sonra qələbəyə həsrət qalan 3 komanda var – “Neftçi”, “Qəbələ”, “Kəpəz”. Gəncə təmsilçisində vəziyyət daha acınacaqlıdır. “Kəpəz” bu mövsüm qələbə bir yana, heç bir xal da qazanmayıb. Adil Şükürovun rəhbərlik etdiyi kollektiv 4 oyunda 4 məğlubiyyət yaşayıb, 2 qol vurub, 13-nü buraxıb.

Maraqlı situasiya isə “Qəbələ” ilə bağlıdır. Ötən mövsüm I Liqada çempion olan Kaxaber Sxadadzenin rəhbərlik etdiyi kollektiv demək olar, hər matç yaxşı təsir bağışlayır. Buna baxmayaraq, aktivlərində cəmi 1 xal var. İlk turda “Karvan-Yevlax”la heç-heçə edən “qırmızılar” ardıcıl üç oyunda xalsız qalıb.

4 turun yekununda məğlub olmayan komandaların sayı isə 2-dir. “Zirə” və “Araz-Naxçıvan” 4 oyunun hər birindən xal və ya xallarla ayrılıb. Lider “Araz-Naxçıvan” ən yaxşı göstəriciyə sahibdir – 3 qələbə, 1 heç-heçə.