Montelladan 0:6 məğlubiyyətinə və ayrılıq ehtimalına şərh

DÇ-2026-nın E qrupunun 2-ci turunda Türlkiyə millisi Konyada İspaniyaya 0:6 hesabı ilə uduzub.

Sport1.az xəbər verir ki, matçdan sonra Türkiyə komandasının baş məşqçi Vincenzo Montella məğlubiyyəti belə şərh edib:

“Hamımız çox məyusuq. Futbolçularımız, azarkeşlərimiz üçün üzülürük. Açığını desəm, oyunun əvvəlində bir neçə qol imkanı qazandıq, amma dəyərləndirə bilmədik. Ardınca ilk fürsətdə qapımızda qol gördük, sonra ikinci top gəldi. Belə olanda zamanla inam da azalır. Nəticədə bu nəticə ortaya çıxdı. Komandamız inkişaf mərhələsindədir. Ağıllı davransaq, bu görüşdən dərs çıxara bilərik. Oyuna nəzər salanda, taktiki baxımdan real analiz etmək mümkün deyil. Futbolçularımız üzərlərinə düşən məsuliyyətin ağırlığını hiss etdiklərinə görə potensiallarından aşağı oynadılar. Rəqib isə meydanın hər yerində ikili mübarizələri qazandı. Bu, taktika ilə bağlı deyil. Ruhdan düşməməliyik.”

Mətbuat konfransında bir jurnalist Montellaya sual verib: “Bundan əvvəl də belə ağır məğlubiyyətlərdən sonra baş məşqçi dəyişikliyi olmuşdu. Siz bu mövzuda narahatlıq hiss edirsinizmi?”

İtalyan mütəxəssis cavabında deyib: “Xeyr, heç bir narahatlığım yoxdur! Qətiyyən! Biz artıq oktyabr ayına köklənmişik. İkinci yeri təmin etmək üçün mübarizə aparacağıq. Dediyim kimi, əsas hədəfimiz Dünya Kubokuna vəsiqə qazanmaqdır”.