"Neftçi" AFFA-nın qərarından narazıdır

Bu gün AFFA-nın İntizam Komitəsinin keçirilən iclasında Misli Premyer Liqasının III turu çərçivəsində oynanılan “Neftçi” – “Turan Tovuz” matçı ilə bağlı qərar qəbul olunub.

Sport1.az xəbər verir ki, qarşılaşmanın 55-ci dəqiqəsində birbaşa qırmızı vərəqə ilə meydandan kənarlaşdırılan “Neftçi”nin futbolçusu İqor Ribeyro 3 oyunluq diskvalifikasiya edilib. Klub bununla yanaşı, 3000 manat məbləğində cərimələnib. “Neftçi” PFK qərarı ağır hesab etdiyini bildirib və bu səbəbdən İntizam Komitəsinin qərarından AFFA-nın Apellyasiya Arbitraj Tribunalına apellyasiya şikayəti təqdim edib.

Qeyd edək ki, Ribeyronun cəzası və klubun cəriməsi oyun zamanı baş vermiş kobudluqla əlaqələndirilib. Klub isə qərarın ədalətli olmadığını düşünür və məsələnin yenidən qiymətləndirilməsini tələb edir.