"İnter"in futbolçusu millidən imtina etdi

“İnter”in müdafiəçisi Françesko Acerbi İtaliya millisinin düşərgəsinə yollanmaqdan imtina edib.

Sport1.az xəbər verir ki, futbolçu yığmasının DÇ-2026-nın seçmə mərhələsi çərçivəsində iyunda keçiriləcək matçlarında oynamayacaq.

37 yaşlı oyunçu qərarını belə izah edib: “Dərin düşünəndən sonra baş məşqçi Luçano Spallettiyə milli komandaya dəvəti qəbul etməyəcəyimi bildirdim.

Bu formanı geyinmək mənim üçün həmişə şərəf və qürur mənbəyi olduğu üçün bu qərar heç də asan verilmədi. Ancaq hiss etdim ki, son hadisələr fonunda vəziyyətin sülh yolu ilə idarə edilməsi üçün şərait yoxdur.

Mən bəhanə və ya lütf axtarmıram, hörmət tələb edirəm. Komandaya rəhbərlik etməli olanlar tərəfindən hörmətsizlik olarsa, mən kənara çəkilməyə üstünlük verəcəyəm. Yığma üçün hər zaman hər şeyimi vermişəm, amma daha məni istəmədikləri yerdə qalmayacağam və layihənin bir hissəsi olmadığım açıq-aydın görünür. Bu mənim qərarımdır, amma yekun deyil və bu fikirlər qəzəblə, hətta Çempionlar Liqasının finalındakı məğlubiyyətə görə “depressiya” ilə diktə olunmur”.

Qeyd edək ki, İtaliya iyunun 6-da səfərdə Norveçlə, 9-da isə evdə Moldova ilə qarşılaşacaq.