Azərbaycan futbolunda növbəti kuryoz hadisə - AFFA nümayəndəsi oyuna gecikdi

Futbol sferasında çalışanlar yaxşı bilir ki, matçların keçirilməsində ən məsul şəxs AFFA nümayəndələridir.

Qaydalara əsasən, onlar hamıdan tez stadionda olmalı, ən azı 2 saat əvvəl klub rəsmiləri, eləcə də təşkilatçılığa cavabdeh şəxslər və təhlükəsizliyə məsul dövlət qurumlarının nümayəndələri ilə iclas keçirməli, tapşırıqlarını verməli, hər şeyin vaxtında icra olunmasını tələb etməlidirlər. Bu görüş o qədər önəmlidir ki, hətta iclasa qatılmayan rəsmilərinə görə klublar cəzalanır.

Sport1.az-a daxil olan məlumata görə, saat 19:45-də start götürəcək Misli Premyer Liqasının 5-ci turunun “Sumqayıt” – “Şamaxı” oyunu ilə bağlı kuryoz hadisə yaşanıb. Qarşılaşmanın AFFA nümayəndəsi Zümrüd Ağayeva iclasa gəlməyib. Bunu görən rəsmilər də xeyli gözlədikdən sonra dağılışıblar. İclasdan 40 dəqiqə keçdikdən sonra məsul şəxs stadiona təşrif buyurub. Klub rəsmiləri ilə ayaqüstü söhbət edərək tapşırıqlar verib.

Maraqlıdır ki, Zümrüd xanım həm də UEFA nümayəndəsi kimi ölkəmizi beynəlxalq oyunlarda təmsil edir. Görəsən, xarici oyunlara geciksə, Ağayevanın, elə AFFA-nın da durumu necə olar?

Görəsən, Zümrüd xanımı kim cəzalandıracaq? Cahangir Fərəcullayev? Deyilənə görə, Zümrüd Ağayeva baş katibin ən sevimli kadrlarındandır.

O baş katibin ki, özünün güc sahibi olduğunu göstərmək üçün AFFA nümayəndəliyini, başqa sözlə, oyunların təşkilində əsas şəxslərin təyinatı hüququnu buna cavabdeh əsas qurumdan – PFL-dən aldırdı.

Ümumiyyətlə, bu halın özü belə kuryozdur. Yarışı bir qurum həyata keçirir, nümayəndəni başqası təyin edir. Bunun nəticəsi də belə gülməli vəziyyətə səbəb olur.