“Dinamo”nun baş məşqçisi: “Bu, oyunu daha da maraqlı edəcək”

Kiyev “Dinamo”sunun baş məşqçisi İqor Kostyuk Konfrans Liqasının III təsnifat mərhələsində “Qarabağ”la Bakıdakı cavab qarşılaşmasından əvvəl keçirilən mətbuat konfransında jurnalistlərin suallarını cavablandırıb.

Sport1.az xəbər verir ki, ukraynalı mütəxəssis ilk olaraq paytaxtımız və ölkəmiz haqqında fikirlərini bölüşüb:

“Şəhəriniz və insanlarınız bizdə çox müsbət təəssürat bağışladı. Azərbaycanın ölkəmizə verdiyi dəstəyi addımbaşı hiss edirik”.

Kostyuk “Qarabağ”ın çalışdırıcısı Qurban Qurbanovun komandadakı uzunmüddətli işini də yüksək qiymətləndirib:

“Qurban Qurbanov illərdir bu klubun sükanı arxasındadır. O, artıq özünəməxsus oyun dəsti-xətti formalaşdırıb. Komanda mütəmadi olaraq beynəlxalq turnirlərdə çıxış edir və yetərincə avrokubok təcrübəsinə sahibdir. Zənnimcə, bütün bu amillər sabahkı görüşü daha maraqlı və gərgin edəcək”.

O, komandadakı zədəli və cəzalı futbolçularla bağlı məsələyə də toxunub:

“Heyətdəki itkilər birinci qarşılaşmadakı kimidir. Yeni bir kənarlaşma və ya zədəlimiz yoxdur”.

Qeyd edək ki, “Qarabağ” Ukraynada tutulan ilk matçda “Dinamo”ya minimum hesabla məğlub olub (0:1). Tərəflər arasında cavab qarşılaşması avqustun 13-də Tofiq Bəhramov adına Respublika stadionunda baş tutacaq və saat 20:00-da start götürəcək.