İvan Lepinitsa: “Mərhələni adlayan tərəf olacağımıza inanırıq”

UEFA Çempionlar Liqasının III təsnifat mərhələsində Danimarkanın “Orhus” klubunu qəbul edəcək “Sabah”ın yarımmüdafiəçisi İvan Lepinitsa qarşılaşmadan əvvəl jurnalistlərin suallarını cavablandırdı.

Sport1.az xəbər verir ki, xorvatiyalı futbolçu komandanın hazırlığı və şansları barədə bunları dedi:

“Danimarkada həqiqətən yaxşı futbol oynadıq. Rəqib cərimə meydançasından kənardan əldə etdiyi iki epizoddan maksimum yararlandı, oyun boyu başqa təhlükəli imkanları da olmadı. Səfər matçına yaxşı hazırlaşmışdıq, Bakıdakı görüşə isə daha yüksək səviyyədə köklənmişik. Özümüzə güvənirik. Mübarizənin 90 dəqiqə və ya əlavə vaxta uzanmasından asılı olmayaraq, mərhələni adlayan tərəf olacağımıza inanırıq”.

​– Komandanın start heyətində yer alacağınız gözlənilir. Yarımmüdafiənin mərkəzində kiminlə yan-yana oynamaq sizin üçün daha rahatdır?

– Uzun müddətdir birgə oynadığım komanda yoldaşımla mübarizə aparmaq daha rahat olardı, lakin heyəti baş məşqçi müəyyənləşdirir. Meydanda kimin olmasından asılı olmayaraq, öz oyunuma və kollektivin ümumi tapşırıqlarına köklənirəm. Futbolçular arasında yaxşı anlaşma və “kimya”nın olması bizim üçün əlavə üstünlükdür.