Ramiz Məmmədov: "Doğma komandamdan ayrılmaq mənim üçün çox çətin oldu"

"Karvan-Yevlax"ın baş məşqçisi Ramiz Məmmədov doğma "Mingəçevir"lə vidalaşıb.

Sport1.az xəbər verir ki, təcrübəli mütəxəssis sosial şəbəkə hesabında paylaşım edərək klubda keçirdiyi bir ili xoş xatirələrlə xatırladığını bildirib.

"Doğma "Mingəçevir"dən ayrılmaq mənim üçün çox çətin olsa da, geridə qalan bir il ərzində xoş izlər qaldı. Bu müddətdə bizdən dəstəyini əsirgəməyən hər kəsə – başda klub rəhbərliyinə, çiyin-çiyinə çalışdığım məşqçilər heyətinə, meydanda hər matçda can qoyan futbolçularımıza və klubun görünməz qəhrəmanları olan inzibati heyətə sonsuz minnətdarlığımı bildirirəm.

Xüsusi təşəkkürüm isə bizi heç bir oyunda tək qoymayan, həm ev, həm də səfər matçlarında komandanın yanında olan fanklubumuza və bütün Mingəçevir azarkeşlərinədir. Sizin tribunadakı dəstəyiniz və sonsuz sevginiz hər zaman bizə güc verdi.

"Mingəçevir"in bir hissəsi olmaq mənim üçün böyük şərəf idi və burada keçirdiyim hər bir anı həmişə minnətdarlıqla xatırlayacağam. Mingəçevirə böyük futbolun gec-tez gələcəyinə inamım tamdır və mənim üçün bu şəhərin, bu klubun yeri hər zaman xüsusi olaraq qalacaq.

Doğma komandama gələcək yolda uğurlar arzulayıram. Hər şey üçün təşəkkürlər!".

Qeyd edək ki, Ramiz Məmmədov yeni mövsümdən etibarən "Karvan-Yevlax"ın baş məşqçisi kimi fəaliyyət göstərəcək.