“Tvente”nin futbolçusu: “Buraxdığımız səhvlərdən dərs çıxarmışıq”

“Tvente”nin yarımmüdafiəçisi Rut Neysdat UEFA Konfrans Liqasının pley-off mərhələsində “Qarabağ”la keçiriləcək cavab qarşılaşması öncəsi komandasının hazırlıq vəziyyətindən söz açıb.

Sport1.az xəbər verir ki, niderlandlı orta sahə oyunçusu Bakıdakı görüşdən əvvəl təşkil olunan mətbuat konfransında jurnalistlərin suallarını cavablandırıb.

Neysdat beynəlxalq turnirlərdə ələ düşən imkanlardan maksimum yararlanmağın vacibliyinə diqqət çəkib:

“Avropa turnirləri yerli çempionatdan fərqli səviyyədir. Burada əldə etdiyin hər bir vəziyyətdən maksimum istifadə etməlisən. İlk qarşılaşma bizim üçün müəyyən təcrübə oldu və buraxdığımız xətalardan dərs çıxardıq. Öz fərdi inkişafım baxımından da Avropa kuboklarında oynamaq böyük əhəmiyyət kəsb edir”.

Yarımmüdafiəçi ilk matçdakı epizodik xətalarına və baş məşqçinin ona verdiyi tapşırıqlara da toxunub:

“Həmin epizodda bir qədər tələskənliyə yol verdim və ötürməni tez etməyə çalışdım. Matç başa çatdıqdan sonra baş məşqçi mənimlə həmsöhbət oldu, nəyi daha düzgün edə biləcəyimi izah etdi. Bu cür dəstəyi hiss etmək mənim üçün çox vacibdir. Cavab qarşılaşmasında komandama daha çox fayda vermək üçün əlimdən gələni edəcəyəm”.

“Qarabağ” – “Tvente” matçı avqustun 27-də, saat 20:00-da Tofiq Bəhramov adına Respublika stadionunda baş tutacaq. Səfərdə keçirilən ilk görüşdə Ağdam təmsilçisi 1:0 hesablı üstünlük əldə edib.