Yuri Vernidub: "Futbolçuların fiziki durumu qənaətbəxşdir"

Sloveniyada təlim-məşq toplanışında olan "Neftçi" ikinci yoxlama oyununda Serbiyanın "Partizan" klubuna 0:1 hesabı ilə uduzub.

Sport1.az xəbər verir ki, "ağ-qaralar"ın baş məşqçisi Yuri Vernidub oyundan sonra klubun mətbuat xidmətin açıqlama verib.

Təcrübəli mütəxəssis rəqibin güclü olduğunu və bu qarşılaşmanın Konfrans Liqasına hazırlıq baxımından böyük əhəmiyyət kəsb etdiyini vurğulayıb:

"Yaxşı oyun oldu. Çox yaxşı rəqiblə qarşılaşdıq. Onlar da bizim kimi Konfrans Liqasının ikinci təsnifat mərhələsinə hazırlaşırlar. Növbəti mərhələlərdə bu tip komandalarla üz-üzə gələcəyik. Hələ ki əsasən gündə iki məşqlə hazırlaşırıq. Buna görə də hər hissədə iki fərqli heyətlə oynadıq. Demək olar, hamıya mübarizə aparmaq şansı yaratdıq.

Hazırda oyunlarımız yükləmə altında keçir. Sabahkı istirahət günündən sonra artıq növbəti matç ərəfəsində yükləmələri yavaş-yavaş azaldacağıq və əsas heyət üzvlərini daha çox – 65-70 dəqiqə oynatmağa başlayacağıq.

Hazırlıq plan üzrə gedir. Artıq toplanışın ikinci yarısında, yükləmələr azaldılandan sonra oyun sistemimiz daha aşkar bilinəcək. Farajın yüngül narahatlığı olduğu üçün bu gün risk edib onu meydana buraxmadıq. Kurçinin vəziyyəti qənaətbəxş deyil. Ola bilər ki, bir neçə həftə buraxsın. Onunla bağlı son diaqnoz bizə veriləcək. Oyunun gedişində Ştoqrində də yüngül narahatlıq hiss etdiyimiz üçün onu dəyişdik. Bununla belə, bütün futbolçuların fiziki durumu qənaətbəxşdir”.