Özbək futbolçudan rekord
Özbəkistan millisinin yarımmüdafiəçisi Abbosbek Fayzullayev dünya çempionatlarında XXI əsrin başla qol vuran ən qısaboylu futbolçusu olub.
Sport1.az xəbər verir ki, bu barədə "Opta" statistik platforması məlumat yayıb.
22 yaşlı futbolçu DÇ-2026-nın qrup mərhələsində Kolumbiyaya qarşı keçirilən oyunda (1:3) fərqlənib. Hazırda Türkiyənin "Başakşehir" klubunda çıxış edən Fayzullayevin boyu 167 sm-dir. Bununla da o, XXI əsrdə dünya çempionatlarında başla qol vuran ən qısaboylu oyunçu rekordunu yeniləyib.
Əvvəlki rekord Uruqvay millisinin yarımmüdafiəçisi Corcian de Arraskaetaya məxsus idi. O, DÇ-2022-də Qana ilə matçda başla qol vurmuşdu. Futbolçunun boyu 173 sm-dir.
Bundan başqa, Abbosbek Fayzullayev Özbəkistan millisinin mundiallar tarixində ilk qolunun müəllifi olub.
