İnfantinonun zarafatından narazı qaldılar
taliyanın idman naziri Andrea Abodi FIFA prezidenti Canni İnfantinonun ölkə millisinin ünvanına səsləndirdiyi istehzalı fikirlərlə bağlı onunla danışmaq niyyətindədir.
Sport1.az xəbər verir ki, bu barədə ANSA agentliyi məlumat yayıb.
Narazılığa səbəb FIFA prezidentinin İtaliya millisinin dünya çempionatına vəsiqə qazana bilməməsi ilə bağlı səsləndirdiyi zarafat olub.
Canni İnfantino müsahibələrinin birində "Dünya çempionatında 64 komanda iştirak etsəydi, bəlkə İtaliya seçmə mərhələni keçə bilərdi. Ola bilsin ki, komanda sayını 228-ə çatdırmaq lazımdır" deyə bildirib.
İtaliyanın idman naziri Andrea Abodi məsələ ilə bağlı FIFA rəhbərinin mövqeyini birbaşa öyrənmək istədiyini vurğulayıb.
"İtaliya ilə Meksika arasındakı məsafəni nəzərə alsaq, vəziyyəti aydınlaşdırmaq üçün telefon danışığı ən yaxşı variant olacaq. Onun fikrini birbaşa eşitmək istəyirəm", - nazir qeyd edib.
Qeyd edək ki, İtaliya millisi ardıcıl üçüncü dəfə futbol üzrə dünya çempionatının final mərhələsinə vəsiqə qazana bilməyib. ABŞ, Meksika və Kanadada keçirilən builki mundialda isə tarixdə ilk dəfə 48 komanda iştirak edir.
