Millinin seçim mexanizmindəki boşluqlar - KÖŞƏ

Azərbaycan futbolunun əsas dərdi istedad azlığı yox, onları düzgün qiymətləndirməməkdir. Bunun son örnəyini U-21-nin heyətindəki yerdəyişmədə gördük.

"Sabah"ın zədələnən üzvü Rəvan Mirzəmmədovun yerinə "Neftçi-2"-dən 16 yaşlı Nurəziz Əzizovun yığmaya dəvəti suallar doğurur. Gənc qolkiperin potensialına söz yoxdur, lakin "Sumqayıt"ın heyətində Premyer Liqa təcrübəsi toplayan Xəyal Fərzullayevin kənarda qalması izaholunmazdır.

Futbolda inkişafın təməli rəqabətdir. Premyer Liqanın təzyiqi ilə əvəzedici heyətin oyun praktikası eyni çəkiyə malik deyil. Beynəlxalq təcrübədə milli komandaya dəvət üçün əsas şərt davamlı oyunmaq olduğu halda, bizdə hazırkı performansı kölgədə qoyan seçimlər edilir. Bu isə elitada özünü sübut edən oyunçunun motivasiyasını qırır.

Problem futbolçu azlığında yox, şəffaf seçim mexanizminin yoxluğundadır. Gənc oyunçular göstərdikləri performansın qiymətləndirilmədiyini gördükdə, klubların onlara güvənməsi də çətinləşir. Milli komandanın qapısı meydanda özünü isbatlayanlara bağlıdırsa, gənclər hansı meyarla irəliləyəcəklərini necə anlasınlar?

Xəyal Fərzullayev məsələsi sadəcə bir futbolçunun taleyi deyil, seçim ədalətinin sınağıdır. Elitada oynayan oyunçu belə diqqətdən kənarda qalırsa, sual vermək haqqımızdır: Xəyal Fərzullayev bu gün milli komandaya layiq deyilsə, nə vaxt olacaq?

MƏHƏMMƏD HÜSEYNOV