Avropa Tovuza gəlir: stadionda işlər başladı - RƏSMİ AÇIQLAMA

“Turan Tovuz” 32 ildən sonra avrokuboklara qayıdır. Qərb təmsilçisi 2026/27 mövsümündə ən azı UEFA Konfrans Liqasında iştirak hüququ qazanıb. İndi isə əsas suallardan biri komandanın beynəlxalq oyunlarını hansı stadionda keçirəcəyidir.

Klubun mətbuat xidmətinin rəhbəri Süleyman Tağıyev məsələ ilə Sport1.az-a bildirib ki, Tovuz şəhər stadionunun UEFA tələblərinə uyğunlaşdırılması istiqamətində işlərə artıq başlanılıb:

“UEFA-nın qaydalarına əsasən, 2-ci kateqoriyaya uyğun stadionlar 1-ci və 2-ci təsnifat mərhələsinin oyunlarını qəbul edə bilir. Biz də mart ayının sonundan etibarən stadionun həmin tələblərə cavab verməsi üçün lazımi addımlar atırıq”.

O qeyd edib ki, mövsüm başa çatdıqdan sonra arenada əlavə işlər görüləcək:

“Media sektorunun genişləndirilməsi və digər texniki məsələlərlə bağlı müəyyən dəyişikliklər edilməlidir. UEFA-nın tələbləri çoxdur, amma bunlar klubumuzun həyata keçirə biləcəyi işlərdir. Əgər komandamız mübarizəyə birinci təsnifat mərhələsindən başlasa, ilk iki oyunu Tovuzda keçirmək imkanımız olacaq”.

Klub rəsmisi yarışa hansı mərhələdən start veriləcəyinin ölkə kubokunun finalından asılı olduğunu da vurğulayıb. Onun sözlərinə görə, “Sabah” həm çempionluğu, həm də kuboku qazanacağı halda, “Turan Tovuz” Konfrans Liqasına ikinci təsnifat mərhələsindən qoşula bilər.

Qeyd edək ki, Tovuz şəhəri tarixində ilk dəfə avrokubok oyununa ev sahibliyi edə bilər. “Turan” 1994-cü ildə UEFA kubokunda “Fənərbağça” ilə ev matçını Sumqayıtda keçirmiş, sonrakı illərdə isə beynəlxalq qarşılaşmalarını Şəmkir, İmişli, Qəbələ və Lənkəranda oynamışdı.