“Neftçi layiq olduğu yerə qayıdacaq” - Cenk Sümer

“Neftçi” klubunun baş icraçı direktoru Cenk Sümer “Qarabağ” üzərində 2:1 hesablı qələbədən sonra media nümayəndələrinin suallarını cavablandırıb.

Sport1.az həmin müsahibəni təqdim edir. 

- Oyunu və qələbəni necə dəyərləndirirsiniz?

-Bu nəticə bizi çox sevindirdi. Qələbə bizim üçün son dərəcə vacib idi. Arxada qoyduğumuz günlər asan keçməmişdi, xüsusilə də öz azarkeşlərimiz qarşısında aldığımız məğlubiyyət komandaya mənfi təsir etmişdi. Belə bir vəziyyətdə kollektivin qısa müddətdə toparlanması və oyuna hazır vəziyyətə gətirilməsi çətin idi. Amma həm rəhbərlik, həm məşqçilər, həm də futbolçular böyük iş gördü. Komanda son saniyəyə qədər mübarizədən çəkilmədi. Bu ruh “Neftçi”nin əsas xüsusiyyətlərindəndir. Azarkeşlərimizə də xüsusi təşəkkür düşür – sona qədər yanımızda oldular. Biz onların çəkdiyi əziyyəti anlayırıq. Məqsədimiz birlikdə “Neftçi”ni layiq olduğu səviyyəyə yüksəltməkdir. Avrokuboklara vəsiqə qazanmaq istəyirik və buna inanırıq. Komanda bu istiqamətdə əlindən gələni edir. Məşqçilər korpusunun rolu da burada çox önəmlidir – onlar kollektivə yenidən inam qazandırdılar. Ümid edirik ki, mövsümü arzuladığımız kimi başa vuracağıq.

- “Neftçi” uzun müddət idi “Qarabağ”a qalib gələ bilmirdi. Bu statistika oyunçulara xatırladılmışdı?

- Bu gün futbolçular hər şeydən xəbərdardır, informasiya əlçatandır. Heyətdəki oyunçuların əksəriyyəti legioner olsa da, klubun böyüklüyünü anlayırlar. Bizim üçün hər qarşılaşma önəmlidir. Güclü rəqibə qarşı oynadıq və haqq etdiyimiz qələbəni qazandıq. Bu nəticə yeni mərhələnin başlanğıcıdır. Klubda geniş yenilənmə prosesi gedir və bunun bəhrəsini gələcəkdə daha aydın görəcəyik.

- Son oyunlarda azarkeş fəallığı artıb. Bu dəstəyin davamını gözləyirsiniz?

- Azarkeşlərimizin stadionda daha çox olması üçün çalışırıq. İnanırıq ki, onların dəstəyi daha da artacaq. Hətta həftə içi keçirilən oyunda belə tribunaların dolu olması sevindirici haldır. Bu, klub üçün çox önəmlidir. Birlikdə uğur qazanacağımıza inanırıq.

- Kubokun nəticəsi avrokuboklara vəsiqəyə təsir edə bilər...

- Biz əsas diqqəti öz oyunumuza yönəltmişik. Məqsədimiz avrokuboklara düşməkdir və bu yolda mübarizəni davam etdirəcəyik. Digər nəticələri əvvəlcədən demək çətindir. Kim daha layiqdirsə, o da Avropaya getsin. Amma “Neftçi”nin yeri hər zaman Avropadır. Biz də Azərbaycanı layiqincə təmsil edəcək komanda qurmaq istəyirik.

- Vensan Abubakarla bağlı yayılan xəbərlərə münasibətiniz necədir?

- Onunla bağlı deyilənlər həqiqətə uyğun deyil. Klub daxilində hər hansı problem yoxdur. Sadəcə zədəsi var və hazırda bərpa prosesi keçir. Həkimlərin rəyinə görə, qısa müddətdə – təxminən bir həftə ərzində yenidən komandaya qoşula biləcək.

MƏHƏMMƏD HÜSEYNOV