"Qarabağ"ın üzvü MLS klubunun təklifini rədd edib - ÖZÜ AÇIQLADI
"MLS-dən imtina etdim".
Sport1.az xəbər verir ki, bunu "Qarabağ"ın qapıçısı Mateuş Koxalski deyib.
O, Polşa mətbuatına müsahibəsində ABŞ-nin MLS Liqasına transfer imkanını rədd etdiyini bildirib:
"Avrokuboklarda oynamaq niyyətindəyəm. Məni burada çıxış edən klublar maraqlandırır. Bu səbəbdən MLS-ə transfer imkanını rədd etdim. Oradan sorğular var idi. Harada oynayacağımı bilmirəm, çünki buna bir neçə məsələ təsir edəcək. Arzum İngiltərə Premyer Liqasıdır. Lakin ehtiyat qapıçı olacağım komandaya getməyəcəyəm. Oynamaq və bir nömrə olmaq istəyirəm".
Koxalski, həmçinin UEFA Çempionlar Liqasında SSC Napoli ilə keçirilən oyuna da toxunub:
"Məğlubiyyətə baxmayaraq bu qarşılaşmanı yaxşı xatırlayıram. Oyundan sonra razı qalmasam da, müsbət məqamlar çox idi. Bir neçə yaxşı qurtarış etdim. Təkcə yaxınlarımdan yox, digər insanlardan da təbriklər aldım. Hətta matçdan sonra “Napoli”nin məşqçilər korpusundan bir nəfər mənə yaxınlaşıb dedi ki, belə davam edim və inkişafdan qalmayım. Bu, mənim üçün böyük motivasiya oldu".
Qeyd edək ki, Mateuş Koxalski 2024-cü ilin avqust ayından etibarən “Qarabağ”ın formasını geyinir.
