Danışığını bilməyən AFFA əməkdaşları - YAZI
İctimai TV-də yayımlanan "Off TOP" verilişinin qonağı olan İlqar Qurbanov maraqlı açıqlama ilə diqqət çəkməyə çalışıb. Millinin direktoru proqramda "McDonald's" yediyinə görə Berti Foqtsun onu yığmaya çağırmadığını dilə gətirib.
Bu açıqlama vaxtında verilsəydi, rezonans doğurardı və hamı İlqar Qurbanovun tərəfində durardı. İndi isə artıq gecdir. Millinin direktoru deyir ki, həmin vaxt AFFA rəhbərliyindən heç kim onun tərəfində durmayıb. Hörmətli İlqar Qurbanov, həmin vaxt AFFA İcraiyyə Komitəsinin üzvü olan dayınız İsgəndər Cavadov da sizə dəstək olmayıb? Yoxsa İK-dakı yerini, AFFA-dakı işini itirməkdən qorxub?
İlqar bəy, "McDonald's" yəni brendin özü yənilmir, orada burger yeyilir. Yəqin ki, bunun fərqini bilmədiyiniz üçün Berti Foqts sizi milliyə dəvət etməyib.
Keçək Ayxan Abbasova! Dünənki mətbuat konfransında yığmanın baş məşqçisinə "Yusif İmanov niyə milliyə çağırılmayıb?" sualı verilib. Cavab fantastikadır: "Niyə çağırılmalı idi? İhi-ihi!"
Deyiləcək söz yoxdur! İzahatdan intellekt yağır, bütün ölkə aydınlandı. Bu açıqlamadan sonra hamıya bəlli oldu ki, Ayxan Abbasov "Sabah" rəhbərliyinin qisasını Yusif İmanovdan almır.
Vallah, millinin baş məşqçisinin mütəmadi olaraq meydanda olan oyunçunun yığmaya çağırılmama səbəbini izah edə bilməməsi biabırçılıqdır! Suala sualla cavab verərək gülməsinin özü utanc vericidir.
Rövşən Nəcəfə, Sərxan Hacıyevə, Cahangir Fərəcullayevə qibtə edirəm. Belə şəxsləri işlə təmin edirlər ki, onlar nəinki iş görmək, hətta danışıq qabiliyyətlərinin olmadığını da hamıya göstərirlər.
İLKİN SULTANLI
