U-21 millisiniz üzvü: "Əsas yığmadan dəvət gözləyirdim"

“Martın 20-dən komandadayam və hazırlıq prosesindəyik. Məşqlərimiz kifayət qədər uğurlu keçir. Bu gün Portuqaliya ilə oyun öncəsi son məşqimiz olacaq. Maraqlı qarşılaşma gözləyirik. Rəqibin gücündən xəbərdarıq. İnşallah, nəticə bizim xeyrimizə olar”.

Sport1.az-ın məlumatına görə, bu fikirləri Azərbaycanın U-21 millisinin futbolçusu Oruc Məmmədov səsləndirib. O, AVRO-2027-nin seçmə mərhələsində Portuqaliyaya qarşı keçiriləcək oyundan əvvəl media nümayəndələrinin suallarını cavablandırıb.

Portuqaliya millisindən çəkinirsiniz, yoxsa bu cür güclü rəqibə qarşı özünüzü sübut etmək üçün motivasiyanız daha yüksəkdir?

Belə rəqiblərlə daha əvvəl də qarşılaşmışıq, müəyyən təcrübəmiz var. Məqsədimiz meydandan ən azı bir xal ilə ayrılmaqdır.

Ayxan Abbasovun rəhbərliyi altında “Şamaxı”da da çıxış edirsən. A millidən dəvət gözləyirdin, yoxsa U-21-də mütəmadi oynamaq sənin üçün daha məqsədəuyğundur?

Hər bir futbolçunun əsas hədəfi milli komandanın əsas heyətinə düşməkdir. Mən də A millidən çağırış gözləyirdim. Lakin məşqçilər heyəti hazırda U-21-də çıxış etməyimi daha məqsədəuyğun hesab edib. Verilən qərarı anlayışla qarşılayıram.