Afrikalı futbolçu "Qarabağ"a baxışa gəldi

Nigeriyanın “Komfort Edge” klubunda çıxış edən Onyema Çukvumaobim karyerasını davam etdirmək məqsədilə Azərbaycana gəlib.

Sport1.az-ın Afrika mətbuatına istinadən yaydığı məlumata görə, 18 yaşlı cinah oyunçusu “Qarabağ”ın dəvəti əsasında ölkəmizə səfər edib.

Bildirilib ki, Ağdam təmsilçisinin akademiyasının baş koordinatoru Aftandil Hacıyev futbolçunu bir müddət əvvəl “Obasa Cup” turniri zamanı diqqətə alıb. Gənc vinger yaxın günlərdə klubda baxışdan keçəcək və məşqçilər korpusunun rəyi həlledici olacaq.

Əgər nigeriyalı oyunçu özünü yaxşı tərəfdən göstərə bilsə, onunla müqavilə imzalanacaq. Bu halda o, mövsümün sonuna qədər akademiyada çıxış edəcək və aşağı yaş qruplarında oynayacaq. Göstərəcəyi performans yüksək olarsa, növbəti mövsümdə əsas komandaya yüksəlmək şansı qazanacaq.