ABŞ klubunun baş məşqçisi: "Nəriman komandaya dinamika qatacaq və ümumi səviyyəni yüksəldəcək"

İnanıram ki, Andre Qomes və Nəriman Axundzadə kimi yeni futbolçular komandaya dinamika qatacaq və ümumi səviyyəni yüksəldəcəklər. 

Sport1.az xəbər verir ki bunu Nəriman Axundzadənin çıxış etdiyi ABŞ-ın “Kolambus Kryu” klubunun baş məşqçisi Henrik Ridström deyib.

İsveçli mütəxəssis bu fikirləri “Toronto”ya qarşı keçirilən oyundan sonra klubun rəsmi saytına açıqlamasında səsləndirib:

“Qarşıdakı müddətdə toparlanmaq, səhvlərimizi aradan qaldırmaq və komanda kimi daha sıx birləşmək üçün imkanımız var. Amma bunun üçün heyətdaxili rəqabəti gücləndirməliyik. Hazırda meydanda kifayət qədər cəsarətli çıxış etmirik. İnanıram ki, Andre Qomes və Nəriman Axundzadə kimi yeni futbolçular komandaya dinamika qatacaq və ümumi səviyyəni yüksəldəcəklər. Onların gəlişi ilə daha ciddi mübarizə aparmaq vacibdir”.

Qeyd edək ki, Nəriman Axundzadə sözügedən qarşılaşmada 88-ci dəqiqədə oyuna daxil olub və bununla da MLS-də çıxış edən ilk azərbaycanlı futbolçu kimi tarixə düşüb. Görüş “Toronto”nun 2:1 hesablı qələbəsi ilə yekunlaşıb.