Qurban Qurbanovu təəccübləndirən Ayxan Abbasov - YAZI

Şahruddin Məhəmmədəliyevin milli komandaya çağırılması gözlənilməz oldu.

Bu qərar futbol ictimaiyyətində maraqla qarşılandı. Çünki Şahruddin "Qarabağ"ın heyətində Premyer Liqada sonuncu dəfə 12-ci turda meydana çıxıb. Onda da zədələnib. 13-cü turdan bəri də adı oyunların iştirak ərizəsinə salınmır. 12 həftə futboldan uzaq olan, yalnız fərdi məşq edən oyunçunun yığmaya çağrılması təbii ki, qəbuledilməzdir.

Gəlin, məntiqli düşünək. Ya da seçimdə məntiq axtaraq. Ayxan Abbasovun bu qərarı yəqin ki, müəyyən plan və yanaşmaya əsaslanır. Ola bilər ki, burada təcrübə faktoru əsas götürülüb. Eyni zamanda əvvəlki çıxışlar da nəzərə alınıb. Bu, məşqçi baxımından başa düşüləndir. Amma milli komanda bərpa mərkəzidir? Meydana çıxmağa hazır olmayan futbolçunun burada nə işi var, ay Ayxan Abbasov?

Qurban Qurbanovun reaksiyası isə məsələnin nə qədər ciddi olduğunu göstərdi. O, "Kəpəz"lə oyundan sonra bu xəbəri eşidəndə təəccübünü gizlətmədi. “Çağırılıb?” reaksiyası bir növ spontan oldu. Yəqin ki, millinin baş məşqçisi başqası olsaydı, reaksiyası da tam başqa olardı. Amma Ayxan dostu, köhnə futbolçusu olduğu üçün sakit davrandı. Əslində Qurban Qurbanov da qərarın düzgün olmadığını səssiz qalaraq dilə gətirdi.

"FIFA Series - 2026” o qədər də ciddi turnir deyil. Buradakı nəticələrə görə şəxsən Ayxan Abbasovu tənqid etməyəcəm. Buna gərək də yoxdur. Amma təcrübəsi var deyə 12 həftədir meydana çıxmayan, zədəsi tam sağalmayan futbolçunu yığmaya çağırmaqda məqsəd nədir?

Ümumiyyətlə, bu turnir üçün 4 qapıçıya gərək var idi? Tutaq ki, lazımdır. Onda Şahruddinin yerinə müxtəlif seçimlər edilə bilərdi. Məsələn, Yusif İmanov niyə yığmaya çağrılmayıb? Mütəmadi oynayır, əvvəllər millinin şərəfini də qoruyub. Mövsüm ərzində Şahruddindən daha çox meydanda olub. İndi ortaya sual çıxır. Yusif milliyə niyə çağrılmayıb?

Mövsümün əvvəlində qapıçı "Sabah"la böyük problemlər yaşadı. Bəlkə Ayxan Abbasov onu millidən kənar qoyaraq cəzalandırır? Təəccübləndiniz? Heç belə düşünməmişdiniz? Həyatdır da, hər şey ola bilər. 

İLKİN SULTANLI