Əfsanənin ruhu meydanda idi: Banişevskinin xatirəsinə keçirilən turnir başa çatdı

“Neftçi” PFK və Moskva “Dinamo”sunun birgə təşkilatçılığı ilə Azərbaycan futbolunun əfsanəsi, unudulmaz “9 nömrə” Anatoli Banişevskinin xatirəsinə həsr olunmuş “Bakı Kuboku” beynəlxalq turniri başa çatıb.

Sport1.az xəbər verir ki, 2015-ci ilədək təvəllüdlü futbolçular arasında “Palms Sports” Futbol Mərkəzində keçirilən və “Neftçi TV” vasitəsilə canlı yayımlanan turnirin sonuncu günündə 4 oyun baş tutub.

7-ci yer uğrunda matçda “Neftçi” “Göztepe”yə 4:1 hesabı ilə qalib gəlib. 5-ci yer uğrunda görüşdə isə “Beşiktaş” “Ulduz”u eyni hesabla məğlub edib. “Qarabağ”a 3:1 hesabı ilə qalib gələn Voronej “Dinamo”su 3-cü, “Kayrat”ı 1:0 hesabı ilə məğlub edən Moskva “Dinamo”su 1-ci yeri tutub.

Final matçından sonra turnirdə iştirak edən ölkələrin dövlət himnləri səsləndirilib. Ardından “Neftçi” PFK-nın baş icraçı direktoru Cenk Sümer, “Sollers” avtomobil istehsalçısı şirkətinin direktorlar şurasının sədri Adil Şirinov və “Dinamo” (Moskva) Futbol Akademiyasının direktoru Aleksandr Kuznetsov çıxış ediblər. Daha sonra əfsanəvi futbolçu Anatoli Banişevskinin həyat yoldaşı İnna Banişevskaya və digər qonaqlara xatirə hədiyyələri təqdim olunub.

Mükafatlandırma mərasimində əvvəlcə sponsorun seçiminə uyğun olaraq, “Qələbə əzminə görə” mükafatı “Neftçi”nin futbolçusu Salman Səlimova, “Ən yaxşı futbolçu” mükafatı isə Voronej “Dinamo”sunun üzvü Maksim Krutskixə verilib.

“Ən yaxşı qapıçı” mükafatı Ponteley Moriniçev (“Dinamo” Moskva), “Ən yaxşı müdafiəçi” Aleksandr Volodin (“Dinamo” Moskva), “Ən yaxşı yarımmüdafiəçi” Aleksandr Aksyonov (“Dinamo” Voronej), “Ən yaxşı hücumçu” Radmir Ştanko (“Kayrat” Almatı), “Ən yaxşı futbolçu” isə Abılay Temirbulatova (“Kayrat” Almatı) təqdim edilib.

Voronej “Dinamo”suna bürünc, Almatı “Kayrat”ına gümüş, Moskva “Dinamo”suna isə kubok və qızıl medallar təqdim edilib.