FİFA İranın oyunlarını ABŞ-də saxladı
FİFA İran millisinin 2026-cı il dünya çempionatında keçirəcəyi oyunların ABŞ-dən Meksikaya köçürülməsi məsələsini gündəmə gətirməyib.
Sport1.az xarici mətbuata istinadən xəbər verir ki, bu barədə “The Times” nəşri məlumat yayıb.
Bir neçə gün əvvəl İran Futbol Federasiyasının prezidenti Mehdi Tac komandanın mundialdakı qarşılaşmalarının ABŞ ərazisindən Meksikaya keçirilməsi ilə bağlı danışıqlar aparıldığını açıqlamışdı. Lakin yayılan xəbərlərə görə, bu təşəbbüs beynəlxalq qurum tərəfindən rəsmi şəkildə müzakirə mövzusu olmayıb.
Bildirilir ki, belə dəyişiklik praktik baxımdan mümkün sayılmır. Çünki qarşılaşmaların keçiriləcəyi stadionlar artıq müəyyənləşdirilib və biletlərin satışı həyata keçirilib. Bu səbəbdən oyunların başqa ölkəyə köçürülməsi digər iştirakçı komandaların proqramına da təsir göstərə bilər.
