Qabon futbolunda xaos: Obameyanq millidən uzaqlaşdırıldı, yığmanın fəaliyyəti dayandırıldı

Qabon milli komandasının fəaliyyəti müvəqqəti dayandırılıb.

Sport1.az xəbər verir ki, bu barədə “The Athletic” nəşri məlumat yayıb. Qərar Afrika Millətlər Kubokunda uğursuz çıxışdan sonra ölkə rəhbərliyi tərəfindən qəbul olunub.

Məlumata görə, turnirdən kənarlaşdırıldıqdan sonra Qabon tərəfi milli televiziya vasitəsilə rəsmi bəyanat yayımlayıb. Açıqlamada komandanın çıxışı utancverici kimi qiymətləndirilib. Bununla yanaşı, Pyer-Emerik Obameyanq və Ekele Manqa yığmanın heyətindən kənarlaşdırılıb, məşqçilər korpusu isə tam tərkibdə buraxılıb.

Afrika Millətlər Kubokunda F qrupunda mübarizə aparan Qabon yığması bütün görüşlərdə məğlub olaraq sonuncu pilləni tutub. Son turda Kot-d’İvuarla qarşılaşmada 2:0 hesabı ilə önə çıxmasına baxmayaraq, ardıcıl üç qol buraxan komanda oyunu məğlubiyyətlə başa vurub.