“Mourinyo bir dəfə Ronaldonu ağlatmışdı”
“Milan”ın yarımmüdafiəçisi Luka Modriç karyerası ərzində çalışdığı məşqçilərlə bağlı fikirlərini bölüşüb və onlar arasında ən sərt olanın adını açıqlayıb.
Sport1.az xəbər verir ki, xorvatiyalı futbolçu Joze Mourinyonun həm məşqçi, həm də insan kimi onun üçün xüsusi fiqur olduğunu bildirib:
“Mourinyo xüsusi şəxsiyyətdir. Həm məşqçi, həm də insan kimi. Məni “Real”a məhz o istədi. Onsuz Madrid klubuna heç vaxt keçə bilməzdim. Təəssüf ki, birlikdə cəmi bir mövsüm işlədik”.
Modriç ən sərt çalışdırıcının kim olması ilə bağlı suala da konkret cavab verib:
“Ən sərt məşqçi Mourinyodur. Mən onun Kriştiano Ronaldonu paltardəyişmə otağında ağlatdığını görmüşəm. Səbəb isə sadə idi – bir epizodda rəqib müdafiəçini izləməməsi. Halbuki Kriştiano meydanda hər zaman özünü tam gücü ilə ortaya qoyan futbolçudur”.
Təcrübəli yarımmüdafiəçi Mourinyonun oyunçularla ünsiyyət tərzinə də toxunub:
“O, futbolçularla çox birbaşa danışır, amma həmişə ədalətlidir. Serxio Ramosla da, gənc futbolçu ilə də eyni cür davranırdı. Nə demək lazım idisə, üzünə deyirdi. Alleqri də bu baxımdan oxşardır. Düzünü demək futbolda əsas prinsipdir”.
