Xames Rodriges Meksikadan ayrılır – Yeni ünvan MLS ola bilər

Kolumbiya millisinin yarımmüdafiəçisi Xames Rodriges karyerasını ABŞ-da davam etdirə bilər.

Sport1.az xəbər verir ki, bu barədə “Marca” nəşri məlumat yayıb. Bildirilir ki, futbolçunun Meksikanın “Leon” klubu ilə müqavilə müddəti başa çatıb. Xames əvvəlcə formaya düşmək və 2026-cı il Dünya Çempionatına hazırlıq məqsədilə Meksikada qalmağı planlaşdırsa da, bu variant reallaşmayıb.

Mətbuatda yarımmüdafiəçinin “UNAM Pumas” və “Krus Asul” klubları ilə adı hallansa da, həmin istiqamətdə konkret addım atılmayıb.

Məlumata görə, Xames Rodriges MLS təmsilçisi “Kolambus Kryu”ya keçməyə yaxındır. Digər MLS klubu “Orlando Siti” də kolumbiyalı futbolçu ilə maraqlanır. Braziliyanın “Santos” klubu ilə bağlı yayılan xəbərlər isə təsdiqini tapmayıb.