Emeri “Arsenal”la oyundan sonra Artetanın əlini niyə sıxmadığını açıqladı

“Aston Villa”nın baş məşqçisi Unai Emeri “Arsenal”a məğlubiyyətdən sonra həmkarı Mikel Arteta ilə niyə əl sıxışmadığını açıqlayıb.

Sport1.az xəbər verir ki, ispaniyalı mütəxəssis İngiltərə Premyer Liqasının 19-cu turunda baş tutan və London klubunun 4:1 hesablı qələbəsi ilə yekunlaşan oyundan sonra yaranan situasiyaya aydınlıq gətirib.

Emerinin sözlərinə görə, burada hər hansı problem və ya hörmətsizlik olmayıb:

“Təkrar görüntüyə baxın. Oyundan sonra mənim adətim həmişə eynidir: rəqib komandanın baş məşqçisi ilə əl sıxıram, sonra köməkçilərim və futbolçularımla görüşürəm və ya paltardəyişmə otağına yollanıram. Mən gözlədim. Amma o, təbii ki, qələbəyə sevinirdi və öz heyəti ilə birlikdə idi. Mən də getməyi üstün tutdum. Mənim üçün problem deyil. Əgər rəqib məşqçi mənə tərəf gəlmirsə, adətən gözləyirəm. Sadəcə hava çox soyuq idi”.

Qeyd edək ki, qarşılaşmadan sonra Unai Emeri ilə Mikel Arteta arasında əl sıxılmaması sosial şəbəkələrdə müzakirələrə səbəb olmuşdu.