“FİFA olmasaydı, dünyanın 150 ölkəsində futbol olmazdı”

FIFA prezidenti Canni İnfantino 2026-cı il Dünya Çempionatı üçün biletlərin yüksək qiyməti ilə bağlı səslənən tənqidlərə münasibət bildirib.

Sport1.az xəbər verir ki, qurum rəhbəri Dubayda təşkil olunan Ümumdünya İdman Sammitində çıxışı zamanı qiymət siyasətinin turnirin xərclərinin qarşılanması və dünya miqyasında futbolun inkişafına xidmət etdiyini vurğulayıb.

İnfantinonun sözlərinə görə, bilet satışından əldə olunan vəsait birbaşa oyunun qlobal səviyyədə dəstəklənməsinə yönəldilir:

“Əsas məsələ ondan ibarətdir ki, bu gəlirlər yenidən futbolun inkişafına yatırılır. Əgər bu qurum olmasaydı, futbol 150-dən çox ölkədə mövcud olmazdı. Dünya Çempionatından əldə edilən gəlirlər hesabına futbol yaşayır və həmin vəsait yenidən oyunun inkişafına sərf olunur”.

Qeyd edək ki, son dövrlərdə bir çox azarkeş DÇ-2026 üçün nəzərdə tutulan bilet qiymətlərinin əvvəlki turnirlərlə müqayisədə xeyli baha olmasından narazılıq edib.

Xatırladaq ki, 2026-cı il mundialı 11 iyun – 19 iyul tarixlərində ABŞ, Kanada və Meksikada keçiriləcək.