"Nottinqem Forest" VAR səs yazılarını tələb edir

"Nottinqem Forest" Premyer Liqanın 18-ci turunda "Mançester Siti"yə qarşı keçirdikləri oyunun hakimindən narazıdır.

Sport1.az xəbər verir ki, klub Rob Consun qərarları ilə bağlı rəsmi şikayət vermək istəyir. 

“Nottinqem” Meydança Hakimləri üzrə Peşəkar Assosiasiyaya (PGMOL) müraciət edərək, referilərlə video köməkçi hakimlər briqadası arasında aparılan danışıqların dinlənilməsini istəyib.

Komandanın baş məşqçisi Şon Dayç hesab edir ki, 83-cü dəqiqədə Rayan Şerkinin vurduğu qələbə qolu Morqan Gibbs-Uayta qarşı qayda pozuntusu səbəbindən ləğv edilməli idi, fasilədən sonra “Mançester Siti”nin müdafiəçisi Ruben Diaşa ikinci sarı vərəqə göstərilməli idi.

Qeyd edək ki, qarşılaşma 2:1 hesabı ilə "şəhərlilər"in xeyrinə başa çatıb.