Kavani futbolçu karyerasını başa vurdu – RƏSMİ
Uruqvay futbolunun canlı əfsanələrindən olan Edinson Kavani peşəkar karyerasını başa vurub.
Sport1.az xəbər verir ki, 38 yaşlı hücumçu qərarını şəxsi sosial şəbəkə hesabı vasitəsilə açıqlayıb. Kavani futbola vida etdiyi paylaşımında bu idman növünün onun həyatındakı rolunu xüsusi vurğulayıb:
“Təşəkkürlər, futbol! Məni formalaşdırdın, məndən çox şey istədin, yıxılanda ayağa qalxmağı və atdığım hər addımın dəyərini öyrətdin. Uşaqlıqda qeyri-mümkün görünən arzularımı reallaşdırmaq imkanı verdin, həm meydanda, həm də meydandan kənarda möhtəşəm insanlarla tanış etdin. Bunların heç biri ailəm, dostlarım, komanda yoldaşlarım, məşqçilərim və ən əsası azarkeşlər olmasaydı mümkün olmazdı. Müxtəlif ölkələrdə və klublarda gördüyüm sevgi ömrüm boyu mənimlə qalacaq. Hər məşqdə və hər oyunda əlimdən gələni etdiyimi bilərək bu yoldan rahatlıqla ayrılıram”.
Karyerası ərzində 745 rəsmi oyunda meydana çıxan Kavani 404 qol vurub, 79 məhsuldar ötürmə ilə yadda qalıb. Təcrübəli forvard müxtəlif illərdə “Napoli”, PSJ və “Mançester Yunayted” kimi klubların formasını geyinib. Onun son klubu “Boka Xuniors” olub.
Uruqvay millisinin heyətində də uzun illər çıxış edən Edinson Kavani milli komanda ilə Amerika Kubokunun qalibi adını qazanıb.
