“Hər iki komanda növbəti mərhələyə layiq idi” – Kaşkilya

“İmişli” bu gün Bizon Azərbaycan Kubokunun 1/8 final mərhələsində “Sabah”la üz-üzə gəlib.

Sport1.az xəbər verir ki, Quba Olimpiya İdman Kompleksində keçirilən qarşılaşmanın əsas vaxtı 1:1 hesabı ilə başa çatıb, əlavə vaxtda isə daha bir qol buraxan bölgə təmsilçisi 1:2 hesabı ilə məğlub olub. Oyundan sonra komandanın baş məşqçisi Xorxe Kaskilya mətbuat konfransı keçirib.

Portuqaliyalı mütəxəssis komandasının göstərdiyi pressinqi və matçın ümumi gedişini belə dəyərləndirib:

“Meydanda iki gözəl komanda var idi. Çox rəqabətli oyun keçdi. İlk hissədə yaxşı “İmişli” var idi. Meydançanın hər yerində çox gözəl pressinq edirdik. İlk hissədə yaxşı çıxış etsək də, qolumuzu tapa bilmədik. “Sabah”ı isə təbrik edirəm. Çox yaxşı ev tapşırığından sonra qapımıza yol tapdılar. Hər iki komanda növbəti mərhələyə layiq idi. Təəssüf ki, bir komanda mübarizəsini davam etdirməlidir. Ona görə də, “Sabah”ı təbrik edirəm.

Biz bu iki matçda məğlub olsaq da, rəqabətli, mübarizəli oyunlar keçirdik. Növbəti matçlara hazırlaşacağıq. Keçən konfransda da bildirmişdim ki, oyunçu almaq, komandanı gücləndirmək istəyirik. Amma qış “transfer pəncərəsi” çox çətin keçir. Biz “Sabah”, “Qarabağ” kimi finans komanda deyilik. Çalışacağıq yeni oyunçular transfer edək. Amma çox çətin olacaq”.