Azərbaycan Kubokunun yeni sponsoru finalda bu komandanın oynamasını istəyir - MÜSAHİBƏ

Bu gün Peşəkar Futbol Liqası (PFL) “Avrora Qrup” ilə sponsorluq müqaviləsi imzalayıb. Anlaşmaya əsasən, Azərbaycan Kuboku bu mövsümdən sözügedən şirkətin ustehsalı olan yerli içki brendinin reklam edilməsi üçün Bizon Azərbaycan Kuboku adlandırılacaq.

Sport1.az xəbər verir ki, tədbirdən sonra “Avrora Qrup”un prezidenti Ceyhun Abbasovun jurnalistlərin suallarını cavablandırıb...

– Əvvəlcə müqavilə ilə bağlı fikirlərinizi eşidək...
– Bu gün futbol ictimaiyyətində bizim üçün çox önəmli, mühüm bir sənədə imza atdıq. PFL-lə “Avrora Qrup” arasında sponsorluq müqaviləsi imzalandı və bundan sonra Azərbaycan Kuboku Bizon Kuboku adlanacaq. Şəxsən bizim, “Avrora” ailəsi üçün çox dəyərlidir. Buna görə, çalışacağıq ki, PFL-lə birgə bu missiyanı layiqincə həyata keçirək.

– Müqavilə bir mövsüm üçün nəzərdə tutulub. Daha uzunmüddətli anlaşma imzalamaq olmazdı?
– Biz qarşı tərəfi sınamaq istədik, onlar da bizi. Hansı tərəfdən baxsan, bu, biznesdir. Bu müqavilənin bizim biznesə, marka dəyərinə gətirəcək dəyərdən söhbət gedir. Mən və komandam da düşünür ki, bu, uzunömürlü olacaq. Qarşılıqlı münasibətlərimiz bu prosesləri daha yuxarılara aparacaq və Azərbaycan futboluna, idmanına öz töhfəmizi verəcəyik. Bilirsiniz ki, futbol idmanın şahıdır və Azərbaycanda da buna çox böyük maraq var. Xüsusən də, doğma “Qarabağ”ımızın son illərdə ortaya qoyduğu performans futbola marağı daha da artırır. Biz də bunun şahidiyik. Eyni zamanda, biz də öz markamıza inanırıq. Yerli brendimiz, sərvətimizdir. On ilin brendidir. Artıq bu sirr deyil, dünyanın 10-a yaxın ölkəsinə bu məhsul ixrac olunur. Bir Azərbaycan məhsulu, brendi kimi öz sözünü deyir.

– Son illər sponsorlar, bir çox şirkətlər Azərbaycan futbolundan yan qaçır. Maraqlıdır, PFL sizi necə razı saldı?
– İdmana olan marağımız, dəstəyimiz qaçılmazdır. Hazırda bir neçə kluba dəstəyimizi veririk. “Zirə”dir, “Sabah”ın alt qruplarına dəstək oluruq. Doğma “Araz-Naxçıvan”ımıza kömək edirik, sponsor kimi dəstək oluruq. PFL-dən də belə bir təklif gəldi və düşünürəm ki, biz də onu layiqincə dəyərləndirmişik.

– Hansı məbləğdə maliyyə ayrılacağını deyə bilərsiniz?
– Xeyr (gülür).

– Yayda hansı klubun kuboku qazanmasını istəyərdiniz?
– Finalda doğma “Qarabağ”ımızı görmək istərdim.

– Bəs digəri?
– Sirr qalsın.

– “Bizon” ölkə kubokunda PFL-ə maliyyə cəhətdən dəstək göstərəcək. Maraqlıdır, PFL-in bu yöndə sizə dəstəyi nə olacaq?
– Daha çox reklam nəzərdə tutulub.

– Bəs o reklamın nə dərəcədə səmərəli olması üçün hansısa ölçü mexanizmi var?
– Bu reklam elə bir şeydir ki, iki vur iki, dörd deyil. Yəni, bunu həmin dəqiqə ölçmək çətindir. Zaman-zaman reklam, marketinq dəstəyi özünü göstərəcək. Ancaq biz “Avrora”nın marketinq qrupu olaraq oturub düşündük ki, bu yola çıxsaq, PFL-lə birgə çalışsaq, uğurlu olarıq.

– Həvəskar futbolçu olduğunuzu söylədiniz. PFL-in prezidenti Elxan Səmədov da əvvəllər oynayırdı. Daha öncə yaşıl meydanlarda qarşılaşmısınız?
– Bəli, özüm həvəskar futbolçuyam, artıq 45 ildir ki, oynayıram. Futbola böyük marağım var. “Avrora Qrup”un daxilində hazırda 36 komanda fəaliyyət göstərir. İlboyu oynayırıq, özüm də bir komandanın üzvüyəm. Elxan müəllimlə çox yaxşı münasibətlərimiz var futbol sahəsində. Bu günkü müqavilənin kökündə məhz bu münasibətlər dayanır.