Faydalı iş əmsalı aşağı olan "Zirə" - TƏHLİL

Azərbaycan klubları üçün avrokubokların ikinci təsnifat mərhələsini qənəatbəxş hesab etmək olar. 4 təmsilçidən 3-ü – “Qarabağ”, “Sabah” və “Araz-Naxçıvan” növbəti mərhələyə adladı, yalnız “Zirə” mübarizəni dayandırdı.

“Köhlən atlar” gözlənildiyi kimi İrlandiyanın “Şelburn” klubunu Çempionlar Liqasından kənarlaşdırdı. Hər iki oyunda rəqibindən aşkar üstün olan Qurban Qurbanovun komandası səfərdəki 3:0-lıq qələbədən sonra evdə də 1:0 hesabı ilə qalib gəldi.

Düşünürəm ki, "Qarabağ"ın hələ də güclənməyə ehtiyacı var. Ağdam təmsilçisi əlinə düşən epizodları sağa-sola xərcləyirdi. Rəqib "Şelburn" deyil, daha güclü kollektiv olsaydı, Qurbanovun komandası belə rahat qələbə qazana bilməyəcəkdi. Bəlkə də, heç qələbə qazana bilməyəcəkdi. "Qarabağ"ın dosta qorxu, düşmənə güvən verən hücum xətti ilə Çempionlar Liqasında nələrsə etmə ehtimalı demək olar ki, 0-a yaxındır. Növbəti rəqib isə "Şkendiya"dır. "Köhlən atlar" favorit tərəfdir. Amma futbolda hər an hər şey ola bilər.

“Sabah” iki görüşdə “Petrokub”dan üstün oyun sərgilədi. Səfərdəki 2:0-lıq rahat qələbədən sonra evdə 4:1 kimi əminlik yaradan nəticə göstərildi. Valdas Dambrauskasın rəhbərliyi altında komanda həm sistemli, həm də ideyalı futbol nümayiş etdirir. Matçda vaxt getdikcə “Sabah”ın üstünlüyü daha çox üzə çıxırdı. Moldova təmsilçisinə qarşı bu, aydın hiss olundu.

Növbəti mərhələdə “Sabah”ı “Levski” (Bolqarıstan) gözləyir. Əvvəlki mərhələdəki performansını davam etdirə bilsə, bu rəqibi də keçmək mümkündür.

Turnirin sürpriz komandası “Araz-Naxçıvan” oldu. Yunanıstanın təcrübəli klubu “Aris”ə qarşı matçlarda Elmar Baxşıyevin komandası həm xarakter, həm də taktiki intizamla seçildi. İlk oyunda 2:1 hesabı ilə qalib gələn təmsilçimiz səfərdə 2:2-lik nəticə ilə mərhələ keçdi. Oyunun sonlarında təzyiqə məruz qalsalar da, soyuqqanlıqlarını qorumağı bacardılar.

Bu nəticə sıradan bir uğur deyil. “Aris” kimi Avropa səviyyəsində keyfiyyətli heyətə malik klubu keçmək, heç də asan iş deyil.

Növbəti mərhələdə isə onları “Omoniya” gözləyir. Kiprin köklü klublarından sayılır. Bir neçə dəfə ölkəmizə gəlib. "Qarabağ"a məğlub olsa da, qəsəbə təmsilçisi "Zirə"dən üstün ola bilib. Azərbaycan təmsilçilərinə qarşı növbəti sınağı “Araz-Naxçıvan"a qarşı olacaq. Bu cütdə isə düşünürəm şanslar bərabərdir.

Təəssüf ki, uğurlu tabloya “Zirə” istisna təşkil etdi. İlk oyunda evdə “Hayduk”la 1:1 hesablı heç-heçə edən komanda səfərdə əlavə vaxtda 1:2 hesabı ilə məğlub oldu və mübarizəni dayandırdı.

Problem təkcə nəticədə deyil, ümumi oyun modelində idi. Rəşad Sadıqovun komandası topa sahib olmada üstün olsa da, faydalı iş əmsalı aşağı idi. "Zirə"nin oyunu parçalanmış və plansız təsir bağışlayırdı. Xorvatiya təmsilçisi həm meydanda, həm də tribunada Sadıqovun komandasından üstün oldu.

NİHAT KƏRİMLİ