Rahid Əmirquliyev bu komandadan təklif gözləyir - AÇIQLAMA

“Şahdağ Qusar” ötən mövsüm məğlub olmadan II Liqada çempion oldu.

Bunun nəticəsində də I Liqaya yüksəldi. Amma hələ də komandadan səs-soraq yoxdur. Qusarlılar toplanışa start verməyib.

Görəsən, komanda nə zaman toplaşacaq? “Şahdağ Qusar”ın I Liqada hədəfi nə olacaq? Suallarımızı Rahid Əmirquliyevə ünvanladıq. Qusar təmsilçisinin kapitanı mövzu ilə Sport1.az-a açıqlamasında bunları söylədi:


"Hələlik komanda olaraq bir araya gəlməmişik. Bir neçə dəfə rəhbərliklə görüşmüşəm, amma deyiblər ki, gözləyin, xəbər edəcəyik. Dəfələrlə demişəm ki, artıq digər klublar toplanışa start verib, transferlər edirlər, gecikməyimiz bizə baha başa gələcək. Yenə də eyni sözü deyirlər. Görünən odur ki, büdcə məsələsi dəqiqləşməyib. Mənim də müqaviləm bitib. Hazırda evdə oturaraq "Şahdağ Qusar" rəhbərliyindən xəbər gözləyirəm. Təbii ki, Qusar təmsilçisi böyük ehtimal I Liqada mübarizə aparacaq. Buna şübhə etmirəm. Ən azından çempion olaraq peşəkar liqaya yüksələn komandanın çıxışına əngəl yaratmazlar. Söhbət ondan gedir ki, qusarlılar hansı məqsəd uğrunda mübarizə aparacaqlar? Hələlik bütün diqqətim "Şahdağ Qusar"dan gələcəyi və oradan gələcək təklifdir. Çox istəyirəm ki, doğma komandamla yenidən peşəkar liqada oynayım".

MİRZƏ S.