“Qarabağ”ın təşkilatçılığı ilə mini futbol turniri keçirilib - ŞƏKİLLƏR

“Qarabağ” klubunun təşkilatçılığı ilə keçirilən “Milli Mətbuat 150” mini futbol turniri başa çatıb.

Sport1.az xəbər verir ki, oyunların ardından mükafatlandırma mərasimi təşkil olunub.

Mükafatları “Qarabağ” klubunun baş direktoru və İdarə Heyətinin üzvü Emrah Çelikel, eləcə də İdarə Heyətinin üzvləri Asif Əsgərov və Rafiq Şahverdiyev təqdim ediblər.

Əvvəlcə turnirin ərsəyə gəlməsində dəstək olan tərəfdaşlara xatirə hədiyyələri, turnir iştirakçıları tərəfindən imzalanmış formalar təqdim olunub. Ardınca görüşləri idarə edən hakimlərə diplom və hədiyyələr verilib. Xanımlar üçün təşkil olunmuş özəl müsabiqələrin qalibi olmuş idman jurnalistlərinə xüsusi hədiyyələr təqdim edilib.

Turnirin yekununa əsasən, “İnternasional” komandası çempion olaraq qızıl medallara və kuboka sahib çıxıb. “J United” gümüş, "CanSports” isə bürünc medallarla təltif olunub.

Qeyd edək ki, turnirin “Ən Yaxşı Oyunçusu” adına layiq görülən "İnternasional" komandasının üzvü Xanoğlan İmanova fərdi kubok təqdim olunub. “Ən Sərrast Oyunçu” mükafatı isə "CanSports" komandasının üzvü Etibar Tağıyevə təqdim edilib.