Qavalayaq! - KÖŞƏ

Dərdimiz böyükdür. Bütün ölkədə matəmdir. “Qarabağ” dünən “Tvente”yə uduzdu. Ardıcıl 13-cü mövsüm avrokuboklara vəsiqə qazana bilmədi.

“Qavalayaq” söhbətini xatırlayanlar bilər. Rövnəq Abdullayev vaxtilə Berti Foqtsla bağlı bu ifadəni işlətmişdi. O vaxt Azərbaycan futbolu həqiqətən ağır vəziyyətdə idi. Klublarımız 2-3 təsnifat mərhələsindən sonra avrokuboklarla vidalaşırdı.

“Qarabağ” “Tvente”ni keçə bilmədi? Vəssalam! Günahkarlar bəllidir!

Qurban Qurbanov? Qavalayaq! Tahir Gözel? O da gəlsin! Emrah Çelikel? Sıramızda üçüncüdür!

Baho! Dünyanın sonudur! "Qarabağ" avrokuboklardan kənarda qaldı! Hamısını qavalayaq!

Qurban Qurbanov 18 ildir “Qarabağ”ın başındadır. Ardıcıl 12 mövsüm komandanı avrokuboklara daşıyıb. Azərbaycan futbolunun tarixində böyük uğurlara imza atıb. Amma “Tvente”ni keçə bilmədi. Deməli, məşqçi deyil. Futboldan başı çıxmır. Qocalıb!

Tahir Gözel illərdir klubu borcsuz idarə edir, büdcəni nəzarətdə saxlayır. Kamilo Duranı 6, Leandro Andrade­ni 3 milyon avroya satdı. Deməli, günahkardır. Xəsislik edir. “Qarabağ”ı qazanc yeri kimi görür.

Emrah Çelikel­dən heç danışmayaq. Niyə futbolçu tapa bilmir? Toral Bayramov gedib, Kamilo Duran və Leandro Andrade satılıb. Niyə qazanılan milyonların qarşılığında normal oyunçular transfer edilmir?

Siz həqiqətən yaxşısınız? Bir məğlubiyyətə görə “Qarabağ”ı və orada çalışanları xalq düşməni elan etməyin səbəbi nədir?

“Qarabağ” yayda 10 yeni futbolçu transfer edib. Yəni, komanda kifayət qədər güclənib. Amma yox! Biz Almaniya, İspaniya, Fransayıq axı! Hər gedənin yerinə 5-10 milyon avroluq futbolçu gətirilməlidir. Gətirmədinsə, Qurban, Tahir, Emrah işini bilmir!

Gəlin, bir az da reallığa baxaq. 2-3 milyon manat “Şamaxı”nın, “Kəpəz”in illik büdcəsidir. Ölkənin stadionlarında işıqlandırma sistemi yoxdur. Çempionatda üç komanda arena tapa bilmədiyi üçün başqa şəhərdə oynayır. Bu ölkədə kollektivlərin məşq keçməsi üçün normal meydança yoxdur, ay camaat!

Amma bütün bunların günahkarı Tahir Gözel, Qurban Qurbanov və Emrah Çelikeldir. Nə gözəl futbol ölkəsiyik.

Sabiq deputat Etibar Vəliyev Qurban Qurbanovdan yaxşı məşqçidir. Kimya müəllimi Vurğun Tahir Gözel­dən yaxşı klub idarə edir. Adsız yüksəkliklərdə qoyun otaran Məlikməmməd isə Emrah Çelikeldən daha yaxşı transfer edir.

Belə çıxır ki, “Qarabağ”ı idarə etmək çox asandır. Sadəcə, hələ bu üç mütəxəssisə fürsət verilməyib.

Ən qəribəsi isə budur. “Qarabağ”ın uğurları artıq bizə adi gəlir. Avropaya getməyi, böyük klublarla oynamağı normal qəbul edirik. Bir dəfə yolun kənarında qalanda isə 18 illik işin üstündən xətt çəkirik.

Qavalayaq!

Qurbanı da, Tahiri də, Emrahı da...

Sonra nə olacaq?

Yenə bir neçə il əvvəlki günlərə qayıdacağıq. “Qarabağ” 2-3 mərhələdən sonra avrokuboklarla vidalaşacaq. Biz də oturub deyəcəyik ki, niyə belə oldu?

Bəlkə o vaxt anlayarıq ki, problem bir oyunda yox, uğuru normal qəbul edib uğursuzluğu faciəyə çevirməyimizdə imiş.