Güləş Federasiyasının "gümüş-bürünc" təsəllisi, erməniyə qismət olan qızıl medal - KÖŞƏ

Bakıda keçirilən U-17 Dünya Çempionatı güləşimizlə bağlı çox acı bir reallığı üzümüzə çırpır.

Sözdə nəticələrimiz fəlakət deyil, medallar var, idmançılarımız finala, yarımfinala qədər yüksəlir. Amma ortada ən vacib məqam çatışmır: ÇEMPİONUMUZ YOXDUR!

Ev sahibi olduğumuz, doğma Bakımızda baş tutan turnirdə hələ də fəxri kürsünün ən yüksək pilləsinə qalxan bircə pəhləvanımız belə gözə dəymir. Yarımfinallara adlamaqla, "bürünc-gümüş"lə təsəlli tapmaq Azərbaycan güləşi üçün nə vaxtdan uğur sayılıb?

Milliyə hər cür şərait yaradılır, dövlət milyonlar ayırır, xaricdə təlim-məşq toplanışları təşkil olunur. Bəs, bəhrəsi? İllüziya yaradan yarımçıq göstəricilərlə baş qatmaq, öz evində zəfər qazana bilməmək illərdir yığılan problemlərin göstəricisidir. U-17 gələcəyin əsas heyəti deməkdir. Sabahın pəhləvanları bu gün qızıl medal həsrəti çəkirsə, gələcək üçün nəyə ümid edirik?

Mundialdan bir gün öncə — 26 iyulda AGF-nin baş katibi Pərvin Piriyevin verdiyi bu açıqlamaya baxın:

"Bizim hədəfimiz ilk sıralarda yer almaqdır. Lakin bu, hazırda əsas prioritetimiz deyil. U-17 keçid yaş dövrüdür. Üstünlük verdiyimiz məsələ idmançıların həm mental, həm də fiziki sağlamlığıdır. Əsas məqam onların texniki fəndləri düzgün icra etmələridir. Yeni bilik və təcrübə qazanmaları üçün səhv etmək şansları olmalıdır".

Hə, Pərvin bəy, "prioritetimiz deyil" deyib yarımçıq nəticələrə bəraət qazandırmaq rahatdır. Biz idmanı siyasətə qatmırıq, beynəlxalq yarışın qaydalarını da yaxşı bilirik. Yunan-Roma güləşində Ermənistan təmsilçisi xalçada qalib gəldi və birinci oldu. Bayrağını yüksəyə qaldıraraq himnini səsləndirdir. Bir azərbaycanlı kimi, öz pəhləvanlarımızın yox, erməni idmançının Bakının tən ortasında çempionluq sevinci yaşaması hər birimizin milli qürurumuza toxundu.

İndi federasiya rəsmilərinə üzümüzü tutub soruşuruq: "Səhv etmək şansı" dediyiniz bu mənzərə, paytaxtımızda keçirilən turnirdə qızıl medalsız qalmağımız sizin milli qürurunuza, heysiyyətinizə zərrə də olsun təsir etmir?! Dünya Çempionatı hələ davam edir. Amma tökülən bu qədər əmək, ayrılan bu qədər imkan göz görə-görə hədərə gedir. Rəhbərlik "fəlakət deyilik" təsəllisi ilə özünə bəraət qazandırmağı dayandırmalıdır. Bu xalq sizdən sıradan yerlər yox, Bakıda çempionluq gözləyir!