Yeniyetmə suya tullananlarımız Sofiyada 4 medal qazandı

Bolqarıstanın paytaxtı Sofiyada keçirilən “Sofia Diving Cup” beynəlxalq turnirində iştirak edən suya tullanma üzrə yeniyetmələrdən ibarət Azərbaycan millisi uğurlu çıxışı ilə yadda qalıb.

Sport1.az xəbər verir ki, təmsilçilərimiz yarışda 3 gümüş və 1 bürünc olmaqla ümumilikdə 4 medal qazanıblar.

Maqsud Tahirli C qrupunda 1 metr tramplindən tullanmada 255,50 xalla gümüş medala sahib çıxıb. Muhamməd Hüseynov E qrupunda 3 metr tramplindən tullanmada 95,35 xalla ikinci olub. Mehri Ağayeva isə E qrupunda 3 metr tramplindən tullanmada bürünc medal qazanıb. O, yarışın ikinci günündə 1 metr tramplindən tullanmada da gümüş medala layiq görülüb.

Digər idmançılar da şəxsi nəticələrini yaxşılaşdırıblar. Ayla Hüseynova ötən illə müqayisədə 20-ci yerdən 11-ci pilləyə yüksəlib, Muhamməd Hüseynov və Sofiya Ağayeva da nəticələrini yaxşılaşdırıblar.

Qeyd edək ki, 14-17 iyul tarixlərində keçirilən turnirdə 15 ölkədən 187 idmançı iştirak edib. Azərbaycan millisi yarışda 7 idmançı ilə təmsil olunub.